Chin sevgi so‘nmas
Sevish bu – to‘rt fasl titrab turgan jon, Iztiroblar ichra yashab sevinish.
Allohdan berilgan ulug‘ bir in’om,
Robbim nazariga tushmoq sevilish.
Sevish ko‘ksingdagi qushga ishonib,
Osmonga uchishga shaylanmoq, demak.
Sevilish – charaqlab yulduzday yonib,
Eng go‘zal ayolga aylanmoq, demak.
Sevish bu– botirlik, istasa yoring,
Umri azizingni tikmoqlik dovga.
Sevilish – jasorat, dilda sharafing,
Tanho qarshi chiqmoq bir qo‘shin yovga
Begim, chidaymiz-da, ziyod, kamiga.
Ishqni tashvishlarga alishib bo‘lmas.
Tushsak birga tushdik hayot domiga,
Aslida chin sevgi yuz yilda so‘nmas.
Munavvara USMONOVA