Академик Шавкат Аюпов

Дунё тан олган етук математик олим, Бутунжаҳон Фанлар академияси академиги (ТWАС), Ўзбекистон Республикаси Олий Мажлиси сенати аъзоси, ЎзР ФА Математика институти директори, академик Шавкат Абдуллаевич Аюпов 1952 йил 14 сентябр куни Тошкент шаҳрида таваллуд топган.

Шавкат Аюпов Тошкент давлат университети (ЎзМУ)нинг математика факультетини тугатган (1974). Сўнгра Тошкент давлат университетида ўқитувчи (1977-79), ЎзР ФА Математика институтида катта илмий ходим (1979-88), алгебра ва анализ бўлими мудири (1986-92), директор (1992-97), 1997-2003-йиллардан Ўзбекистон Республикаси Олий Аттестация Комиссияси раиси лавозимларида фаолият юритган. Асосий илмий ишлари функционал анализ ва унинг замонавий тармоқларидан бири ҳисобланган операторлар алгебралари назариясига оид.

Математик олим Шавкат Аюпов 1980 йилда Америка математика жамияти аъзоси, 1995 йилда ЎзР ФА ҳақиқий аъзоси (академик) этиб сайланган.

1996 йилда “Шуҳрат” медали, 2003 йилда “Меҳнат шуҳрати” ордени билан тақдирланган. 2008 йилда Монголия Фанлар академияси аъзоси этиб сайланган. Шунингдек, Ш. Аюпов Абдус Салом номидаги Халқаро Назарий физика маркази (ИCТП) (Триест, Италия) ва Турк дунёси Математика жамиятининг илмий жамғарма бошқармаси аъзоси ҳамдир.

У 2011 йилда давлатимизнинг юксак мукофоти “Ўзбекистон Республикаси Фан Арбоби” фахрий унвони билан тақдирланган.

Ш. Аюповнинг илмий раҳбарлигида 10 та фан доктори ва 42 та фан номзоди тайёрланган.

Тележурналист Шаҳноза Қурбонбоеванинг "Замондош" кўрсатувида академик Ш. Аюпов ҳақида.