Маҳалла посбонларининг нафақаси ундирилди


     Маълумки, юртимиздаги ҳар бир инсон меҳнат қилиш, эркин касб танлаш, адолатли меҳнат шароитларида ишлаш ва қонунда кўрсатилган тартибда ишсизликдан ҳимояланиш ҳуқуқига эгадир. Ушбу қоидалар Ўзбекистон Республикаси Конституциясининг 37-моддасида, Меҳнат кодексида ҳамда меҳнат қонунчилигига оид норматив-ҳуқуқий ҳужжатларда ҳам акс эттирилган.
     Шунингдек, Меҳнат кодексининг 67-моддасида “Аҳолини иш билан таъминлаш тўғрисида”ги Ўзбекистон Республикасининг Қонунининг 27-моддасида ходимларга моддий мададлар бериш кафолатлари белгиланган бўлиб, ушбу моддаларда “Ходимлар сони (штатлар) қисқариши, корхоналар, муассасалар ва қайта ташкил этилиши ёки тугатилиши муносабати билан ишдан бўшатиладиган ходимларнинг иш қидириш даврида олдинги иш жойидаги икки ойлик ўртача иш ҳақи (ишдан бўшатиш нафақаси қўшиб ҳисобланганда) сақланиб қолади. Ходимлар ишдан бўшатилган кундан бошлаб 10 иш куни ичида давлат иш билан таъминлаш хизматларида рўйхатдан ўтсалар учинчи ой учун ҳам олдинги иш жойидан ўртача иш ҳақини давлат иш билан таъминлаш хизматларининг маълумотномасига биноан олишга ҳақлидирлар. 
     Юқоридаги сабабларга кўра ишдан бўшатилган ходимлар ҳар қандай ҳолатда ҳам ишдан бўшаган вақтдан бошлаб уч ой муддат ичида меҳнат стажини сақлаб қоладилар” деб кўрсатилган.
     Қува туман адлия бўлими томонидан жорий йилнинг 1-ярим йиллиги давомида жисмоний ва юридик шахсларнинг 230 дан ортиқ мурожаатлари ўрганилиб чиқилди. Мурожаатларни ўрганиб чиқиш жараёнида давлат органлари ва ташкилотлари томонидан ходимларнинг меҳнат ҳуқуқлари, уларни моддий кафолатлари тўғрисидаги қонун ҳужжатлари талаблари бузилаётганлиги аниқланди. 
     Жумладан, адлия бўлимига тумандаги маҳалла фуқаролар йиғинларида “Маҳалла посбони” жамоатчилик тузилмаси раҳбари лавозимида ишлаган айрим фуқаролардан ишдан бўшатиш нафақаси тўланмай келинаётганлигидан норози бўлиб ёзган мурожаатлари келиб тушган.
     Адлия бўлими томонидан мурожаатларни ўрганиш жараёнида аниқланишича, Ўзбекистон Республикаси Президентининг 2018 йил 24 декабрдаги “Жамоат хавфсизлигини таъминлаш самарадорлигини ошириш бўйича қўшимча чора-тадбирлар тўғрисида”ги 4075-сонли Қарорига асосан “Маҳалла посбони” жамоатчилик тузилмаси тугатилганлиги сабабли 
     ушбу лавозимда ишлаган ходимлар билан жорий йилнинг 1 март кунидан Меҳнат кодексининг 100-модда иккинчи қисмининг 1-банди билан меҳнат шартномаси бекор қилинган бўлса, туман ҳокимлиги томонидан ишдан бўшатиш нафақаси тўланмаган.
     Аниқланган ҳолатлар бўйича Қува туман ҳокими номига қонун ҳужжатларининг бузилиши ва бунга олиб келувчи шарт-шароитларни бартараф этиш тўғрисида ҳамда бўлимга ариза билан мурожаат қилмаган тумандаги “Маҳалла посбони” жамоатчилик тузилмаси раҳбари лавозимида ишлаган барча ходимларнинг ишдан бўшатиш нафақаларини тўлаб берилишини таъминлаш юзасидан тақдимнома киритилди.
     Тақдимнома ижроси таъминланиб, жорий йилнинг 8 июль куни тумандаги мавжуд 65 та МФЙларда фаолият юритган “Маҳалла посбони” жамоатчилик тузилмаси раҳбари лавозимида ишлаган ҳодимларга нисбатан 95 193930 сўм ишдан бўшатиш нафақалари тўлиқ ундириб берилиши таъминланди.
     Зеро, юртимиздаги ҳар бир инсон қонун билан белгиланган имтиёзлардан фойдаланиш ҳуқуқига эгадирлар.

Гулноза ҚОДИРОВА,
Қува туман адлия бўлими бош маслаҳатчиси.

Маъруфа СОЛИЕВА
"МУШТУМ" журналининг махсус мухбири