ДУНЁ -- УМРИМ ДАШТИ
ДУНЁ -- УМРИМ ДАШТИ
Баланд чўққиларга боқиб олисдан,
Юрагим ҳаприқар, митти юрагим!
Пок орзу - ниятим, завқ -- ширин ҳисдан,
Ижобат айлагин Роббим, тилагим!
Бир шиддат балқийди руҳ исёнида,
Қўлимни чўзаман, Сен жуда баланд!
Наҳот тафаккурим ишқ туғёнида,
Муҳаббатинг менга бермайди ҳеч панд!
Кўнглимнинг юпанчи -- Отамдир, Онам,
Устозлар меҳридан қалб олар зиё.
Гўёки қўлимда бу даҳр -- олам,
Мени сарҳуш айлар, қилар маҳлиё!
Умрим битигига не битмиш Тангрим?
Сабр -- қаноатдан гуллайди кўнглим.
Шу Ватан сурурим, уйим -- ғурурим,
Иффат ва ҳаёдан яшнайди умрим!
Дилда шукроналик ҳиссин туяман,
Шоширар замоннинг шиддатли шашти...
О, Ватан мен сени дилдан суяман,
Дунё -- умрим дашти, руҳимнинг гашти!..
Мадинабону
МУҲАММАДРИЗОЕВА