Қалбингни бер...
Майли, кетгин...
намозшом гуллар,
Ой нурида йиғлаган каби.
Нигоҳингдан битта нур тилаб,
Пичирлайди илинжим лаби.
Қарамайсан...
изингни ювар,
Кўзларимдан оққан соғинч - май.
Майли, кетгил, шу видо ҳаққи,
Қалбингни бер!.. сўнгги бор ўпай.
Сен барибир яхшисан... ўтган
Кунлар учун юз бора қуллуқ.
Фақат бас қил, дема...
ишқ - умр.
Бу эртакнинг ниҳояси йўқ!
Қара, туннинг беҳуш бағрида,
Дилпора ой мастона қалқир.
Азобларнинг кечиб наҳридан,
Кўришармиз биз яна балки.
Хайр дема... кўзларимда қол,
Қара, дийдам тўла соғинч - май.
Умримни ол...
Азобимни ол...
қалбингни бер!
...бир марта ўпай!..
Зебо МИРЗО - Ўзбекистон Ёзувчилар уюшмаси аъзоси, "Шуҳрат" медали соҳибаси, шоира.
Таниқли актриса, устоз санъаткор, дубляж устаси - Римма Аҳмедова ижросида ўқилган.