Пилла етиштириш ва ипакчилик соҳасида

Ўзбекистон Республикаси Президентининг “Пилла етиштириш ва ипакчилик соҳасида бозор механизмларини жорий қилишни жадаллаштириш бўйича қўшимча чора-тадбирлар тўғрисида”ги Фармони (ПФ-72-сон, 03.05.2024 й.) қабул қилинди.

Фармонга кўра, пилла етиштириш ва ипакчилик соҳасида 2024–2027 йиллар давомида:

- тутзорлар ер майдони 160 минг гектарга, дала четларидаги якка қатор экилган тут дарахтлари сони 500 миллионга;

- республикада ипак қурти уруғига бўлган эҳтиёжни маҳаллийлаштириш даражаси 80 фоизга;

- республикада ишлаб чиқариладиган хом ипак сифати 5А классга ҳамда уни қайта ишлаш даражаси 75 фоизга етказилади.

Президент Фармонида назарда тутилган 105 минг гектар ер майдони “E-auksion” электрон савдо платформасига ижарага бериш учун аниқланган бошланғич баҳосининг 10 фоизи миқдоридаги нарх билан жойлаштирилади.

“Ўзбекипаксаноат” уюшмаси ва унинг таркибидаги корхоналар томонидан:

- 2024 йилда етиштириладиган пилланинг тавсиявий харид нархини 25 фоизга ошириш;

- 2024 йилдан бошлаб пиллачилик кластерлари томонидан етиштирилган пилла ҳосили учун якуний ҳисоб-китобларни амалга ошириш муддати сентябрь ойи этиб белгиланди.

Ўзбекистон Республикасининг Солиқ кодексига мувофиқ:

- Ўзи ишлаб чиқарган ўз қишлоқ хўжалиги маҳсулотини реализация қилишдан олинган фойда бўйича Солиқ кодексининг 57-моддасида назарда тутилган мезонларга жавоб берувчи қишлоқ хўжалиги товар ишлаб чиқарувчилари учун фойда солиғи ноль ставкада қўлланилиши;

- Ипак қурти учун фойдаланиладиган қишлоқ хўжалиги корхоналари балансида бўлган мол-мулкларга юридик шахсларнинг мол-мулкига солинадиган солиқ солинмаслиги эътироф этилди.

Х. Акбаров -

Андижон вилоят, Хўжаобод туман

Адлия бўлими бош маслаҳатчиси.