Феруза Мустафоевага табрик

28 август – Муқимий номидаги Ўзбекистон давлат мусиқали театрининг актрисаси Феруза Мустафоева таваллуд топган кун.

Театр жамоаси номидан Ферузага узоқ умр, мустаҳкам соғлиқ, оилавий тинчлик ва ижодий ютуқлар тилаймиз!

Маълумот: Муқимий номидаги Ўзбекистон давлат мусиқали театрининг актрисаси – Феруза Рустамовна Мустафоева 1991 йил 28 август Қашқадарё вилояти Шаҳрисабз туманида туғилган.

Маълумоти олий. 2012 йили Тошкент давлат санъат институтининг театр ва кино актёрлиги факультетини битирган.

Мазкур театрда 2012 йилдан буён ишлаб келмоқда.

Феруза Мустафоева театрдаги фаолияти давомида репертуардан жой олган қатор спектаклларда хилма хил образлар яратиб, томошабинлар эътиборига тушган ижодкорлардан бири. У “Осмондаги Ҳулкарим”да Сарвиноз, “Суперқайнона”да Гулчеҳра, “Осмонга сиғмаган қуш”да Намуна, “Меҳр нури”да -1-аёл ва Ойгул, “Олифта”да Саломат, “Антиқа совчилар”да Наргиза, “Тоҳир ва Зуҳра”да Моҳим, “Дилдаги доғ”да Лола, “Қобил ва Ҳобил”да Иқлима, Юлдуз ва бошқа спектаклларда етакчи ролларни ижро этиб келмоқда.

Айниқса, унинг “Олифта” спектаклидаги Саломат образи ўзининг ички кечинмаларга бойлиги, унинг мураккаб ҳаёт йўлини босиб ўтганлигини ишончи гавдалантирганлиги кўпчиликка маъқул бўлди.

Феруза Мустафоева ҳозирги кунда етук ва тажрибали ҳамда юксак салоҳиятга эга ижодкор бўлиб етишган. Бунинг яққол намунаси сифатида театрда давлат буюртмаси асосида саҳналаштирилган “Тоҳир ва Зуҳра” (А. Навоий достони асосида Хуршид асари) спектаклида Моҳим образини маҳорат билан ижро этиш орқали катта эътироф қозонгани алоҳида аҳамият касб этди.

У ўзининг театрдаги серқирра ижодий фаолияти билан бир қаторда экран санъатига ҳам муносиб ҳисса қўшиб келмоқда. “Туташ тақдирлар”, “Қалдирғочлар яна қайтади”, “Опа-сингиллар”, “Нима учун” ва бошқа телесериалларда етакчи ролларни ижро этган.

Актриса шунингдек, “Одноклассники”, “Иснод” каби фильмларда, “Меҳмонхона”, “Ёдгор”, “Олтин даврим”, “Бахтли оиламиз”, “Келин куёв” телесериалларида салмоқли роллар яратиш билан бир қаторда “Миллий” телеканалда “Тurist.uz” ва “Ширчой” кўрсатувларида бошловчилик фаолиятини юргизиб келмоқда.