Мирзапўлат Тошпўлатовга табрик

Ўзбекистон Ёзувчилар уюшмаси аъзоси, ёзувчи, киносценарийчи Мирзапўлат Тошпўлатовни таваллуд топган куни билан табриклаймиз.

Мирзапўлат Тошпўлатовга мустаҳкам соғлик, узоқ умр, ижодий ва ижобий ютуқлар тилаб қоламиз!

Маълумот: Мирзапўлат Тошпўлатов 1952 йилнинг 1 сентябрида Қашқадарё вилоятининг Қарши туманига қарашли Дашту Файзобод қишлоғида туғилган. Тошкент Давлат университети (ҳозирги ЎзМУ)нинг Журналистика факультетида сабоқ олган. Илк китоби “Юракдаги сир” номи билан чоп этилган. Шундан кейин адиб қатор асарларини китобхонлар ҳукмига ҳавола этади. 1979 йилда “Беором тўлқинлар”,1985 йилда “Ойни ахтараётган бола”, 1989 йилда “Бахт юлдузи”, 1991 йилда “Санам тоғидаги гулхан”, 2007 йилда “Сайланма”, 2019 йилда "Тонгги фаришталар" номли китоблари чоп этилади.

Мирзапўлат Тошпўлатов нафақат ёзувчи, балки киносценарийчи ҳам. Унинг асарлари асосида “Олов қаъридаги фаришта” (1994), “Гуноҳ” (1995), “Тавба” (1996), “Муаллиф” (1999), “Занжир” (2001), “Музаффар” (2003) сингари бадиий филмлар суратга олинган.

Адиб тартиб берган янги сайланманинг 1-китоби “Одамлар” яқинда нашр бўлди. “Майдон” номли ҳикоя билан бошланиб, номи сайланмага сарлавҳа бўлган “Одамлар” билан хотима топадиган китобдан адиб турли йилларда ёзган, жами катта-кичик 38 та мустақил ҳикоя ва ҳикоячалар ўрин олган.