Менинг халқим


Бир келса гар, келар экан кетма-кет,
Шу жумладан, турли бало, офат ҳам.
Бизга гўё табиат дер: "Қадр эт,
Омонатдир хотиржамлик, роҳат ҳам".

Шамол келди, томлар кўчди тўфондан,
Бедорланди Бухоронинг пирлари.
Кун ўтмасдан сувлар тошди тўғондан,
Ошкорланди Сирдарёнинг сирлари.

Юртимнинг лек руҳи тетик ва бардам,
Ваҳима йўқ, саросима йўқ бизда.
Сабр мўлдир, шукур кўпдир қийин дам,
Иймонлимиз – шундан кўнгил тўқ бизда.

Элим билар – юки ерда қолмагай,
Тикланади уйлар, томлар ёпилар.
Офат асло дилга ваҳм солмагай,
Боши омон бўлса, дўппи топилар.

Бир тан бўлиб, бир жон бўлиб олар дард,
Бир-бирини қўллаб, ғамга бермагай.
Ҳар қандайин синовда ҳам қолар мард,
Менинг халқим ҳеч талафот кўрмагай!

2020.2.5. 06:06.

   Ўзбекистон Ёзувчилар уюшмаси аъзоси, шоир - Бобур Бобомурод шеъри.
   Нотиқлик санъати академияси таълим муассасаси раҳбари, филология фанлари номзоди, доцент - Раҳимбой Жуманиёзов ижросида ўқилди.