Xайрулла Саъдиев таваллуд топган кун


   Ўзбекистон халқ артисти, “Меҳнат шуҳрати” ордени соҳиби, "Ўзбекистон Республикасида хизмат кўрсатган ёшлар мураббийси", Ўзбекистон Давлат Сатира театри бадиий раҳбари, "Зумраша" болалар киножурнали бадиий раҳбари ва кино актёри - Хайрулла Саъдиевни таваллуд топган куни муносабати билан самимий муборакбод этамиз!
    Устоз санъаткорга мустаҳкам соғлик, узоқ умр, ижодий ва ижобий ютуқлар тилаб қоламиз!

Камоли эҳтиром ила - Ўзбекистон Давлат Сатира театри ва Muzaffar.uz сайтининг ижодий жамоалари. 

   Маълумот: Ўзбекистон xалқ артисти - Хайрулла Саъдиев 1940 йилнинг 6 Декабрь куни Тошкентда туғилган. 1963 йилда Ўзбекистон давлат театр ва рассомлик санъати институтини тугатган. Хайрулла Саъдиев аввал Ҳамза театрида Зуҳур Қобулов қўйган “Булутлар тарқаганда” спектаклида қатнашган. Тошхўжа Хўжаев:” Йигит, сиз асли ёш томошабинлар театрига моссиз. Адашманг”, - деб маслаҳат беради. Шундан кейин у йўлланма билан Ўзбекистон Давлат Ёш томошабинлар театрига ишга келади. Институтда устозлари Назира Алиева, Тошхўжа Хўжаевлардан таҳсил олгани, ёш томошабинлар театрида Иброҳим Аҳмедов, Афандихон Исмоилов, Воҳид Қодиров, Обид Толипов каби саҳна усталаридан актёрлик санъати сирларини ўргангани унинг театрида ўз ўрнини топишида муҳим аҳамиятга эга бўлган. Ғ. Ғуломнинг “Шум бола” асари Х. Саъдиевни кенг жамоатчиликка танитган. Кейинчалик бу қисса телевидениеда ҳам саҳналаштирилган. Бунда, албатта Шум бола образини моҳирона ижро этган Х. Саъдиевни ҳиссаси катта эди.  
    Х. Саъдиев ёш томошабинлар театрида ишлаган даврларида-ёқ ўз ижодий қиёфасига ва услубига эга бўлган. Шунингдек, телевизион миниатюралар театри ва кинодаги бир қанча роллари билан халқимизга янада танилди. 
  Хайрулла Саъдиев Республика Ёш томошабинлар театрида ижодий фаолиятини бошлаган. Театр саҳнасида “Ревизор”,  “Этик кийган мушук”,  "Шум бола" каби ўнлаб спектаклларда ёдда қоларли ролларни ижро этган.   
  Севимли ижодкоримиз кино оламида ҳам самарали меҳнат қилиб келади. "Тўйлар муборак", "Чинор", "Алпомиш", "Чашма", “Ўтов”, “Шайтанат”, "Шиддат", "Марғиёна", "Йўқолган одам", "Иблис девори", "Учар отлар", "Дилор, Дилор, Дил ва Ор", "Новда", "Қўрғошин", "Ойқиз эртаги", "Назира" каби кўплаб сериал ва бадиий фильмларда яратган образлари орқали кўплаб мухлислар орттирган.  
 
  Х. Саъдиев 1980 йил “Ўзбекистонда хизмат кўрсатган артист”, 1990 йил “Ўзбекистон халқ артисти” унвонлари билан тақдирланган. 2005 йил эса "Меҳнат шуҳрати" орденининг соҳиби бўлди.   
  Айни вақтда Ўзбекистон Давлат Сатира театрида фаолият юритиб келади.










Гость, изоҳ қолдирасизми?
Имя:*
E-Mail:


Маълумот