МАТБУОТ – МИЛЛАТ ТАФАККУРИ, ЖАМИЯТ ВИЖДОНИ БЎЛСИН!

27 июнь — Матбуот ва оммавий ахборот воситалари ходимлари куни муносабати билан барча ҳамкасбларимизни табриклаймиз!

Ҳақиқатнинг қалами синмайди. Виждоннинг овози ўчмайди. Эл дардини юрагига жо қилган журналистнинг қалби эса ҳамиша замон билан ҳамнафас уради.

Матбуот — бу шунчаки ахборот тарқатиш воситаси эмас. У миллатнинг тафаккури, жамиятнинг виждони, даврнинг бадиий ва тарихий хотирасидир. Газета ва журнал саҳифаларига битилган ҳар бир сатр, радио тўлқинларида янграган ҳар бир сўз, телевидение экранлари орқали етказилган ҳар бир лавҳа ва рақамли майдонларда эълон қилинган ҳар бир мақола келажак учун ҳужжат, бугун учун эса ишонч манбаи бўлиши шарт!

Журналистнинг ҳақиқий мукофоти — минглаб одамларнинг қалбига етиб борган фикр, ўқувчининг ишончи, томошабиннинг эҳтироми ва Ватан тараққиётига қўшган ҳиссасидир. Шунинг учун ҳам қалам аҳлининг меҳнати вақт билан эмас, унинг жамият ҳаётида қолдирган изи билан баҳоланади.

Матбуот соҳасида фаолият юритаётган инсонлар шиддат билан ўзгараётган ахборот оқимида нафақат тезкорликни, балки холисликни, масъулиятни, миллий манфаатни ва маънавий қадриятларни ҳам асраб келмоқдалар. Бу эса катта билим, мустаҳкам ирода ва юксак фидойилик талаб этади.

Бугун қалами билан миллат маънавиятини бойитаётган муҳаррирлар, журналистлар, мухбирлар, фотомухбирлар, операторлар, режиссёрлар, бошловчилар, матбуот котиблари, нашриёт ходимлари, таржимонлар ва барча оммавий ахборот воситалари вакилларига юксак эҳтиромимизни изҳор этамиз.

Сизларнинг ҳар бир ёзганларингиз одамларни ўйлашга ундасин, ҳар бир суҳбатингиз эзгуликка хизмат қилсин, ҳар бир мақолангиз ҳақиқат ва адолатнинг мустаҳкам пойдеворига айлансин.

Қаламингиз ўткир, сўзингиз таъсирчан, нигоҳингиз теран бўлсин.

Ижодингизда янги изланишлар, улкан муваффақият, нуфузли мукофотлар ва халқ меҳри ҳамиша ҳамроҳ бўлсин.

Оилангизга тинчлик, хонадонларингизга барака, қалбингизга илҳом, ҳаётингизга бахт ва омад тилаймиз.

Қаламингиз ҳақиқатга, сўзингиз инсон қадрига, ижодингиз эса Ватан тараққиётига хизмат қилишдан асло тўхтамасин!

Касб байрамингиз муборак бўлсин, азиз журналистлар!

Камоли эҳтиром ила – Музаффар МУҲАММАДНАЗАР,

Muzaffar.uz веб сайти ва «Ижод чашмаси» журнали бош муҳаррири.