Шукуржон Сапаевага табрик

Актриса, драматург, режиссёр ҳамда педагог – Шукуржон Сапаевани таваллуд топган куни муносабати билан чин юракдан муборакбод этамиз!

Севимли санъаткоримиз, театр саҳнасининг чинакам ЮЛДУЗИ, бир қанча ролларни маромига етказиб ижро этган бўлса-да, кўпчилигимизнинг хотирамизда Уйғун асари асосида саҳналаштирилган «Парвона» спектаклидаги Юлдуз образи орқали муҳрланиб қолган гўзал актрисамизга мустаҳкам соғлик, узоқ умр, ижодий ва ижобий ютуқлар тилаймиз!

Маълумот: Шукуржон Сапаева Хоразм вилоятининг Боғот туманида 1949 йилнинг 5 декабрь куни туғилган. Аммо уйда туғилгани учун туғилганлик гувоҳномасини олиш кечикиб, 1950 йилнинг 12 февраль куни олингани сабабли, гувоҳномада туғилган йилида гувоҳнома олинган сана кўрсатилган.

Шукуржон Сапаеванинг ота-онаси асли Янгиариқ туманидан бўлиб, 1948 йили Боғот туманига ишлашга юборилган.

1959 йилда Шукуржон Сапаева оиласи билан Тошкент шаҳрига кўчиб келишган. Мактабда ўқиб юрган пайтлари Шукуржон Сапаева мактаб қошидаги драматик тўгаракка қатнаб, турли саҳна кўринишларида фаоллик кўрсатгани учун, уни “актриса” деб чақириб, ҳазиллашишган.

1965 йилда “Ўзбекфильм” қошида Театр студияси очилганини эшитган Шукуржон, онасига ўша ерга олиб боришни илтимос қилгач, она қизининг раъйини қайтармай, уни киностудияга олиб борган. Киностудияда Шукуржон Сапаева 16 ёшга тўлмаганлиги, паспорти йўқлигини айтиб, студияга қабул қилишмаган. Шукуржон хафа бўлиб турганида, ёнига бир киши келиб, ундан нега хафалигининг сабабини сўраган. Вазиятдан хабар топган ўша киши ундан кинода ўзини синаб кўриш таклифини берган. Шукуржон бу таклифдан хурсанд бўлган. Ўша киши ўша вақтда режиссёр Али Ҳамроевнинг ёрдамчиси, кейинчалик режиссёр бўлган Мелис Абзалов эди.

Шу тарзда Шукуржон Сапаеванинг кинода «Оппоқ, оппоқ лайлаклар» фильмида биринчи дебюти бошланган. Шукуржон мактабни битиргач, Тошкент Театр ва рассомлик институтига ўқишга кириб, “Театр ва кино” факультетида таҳсил олган. Устози Ўзбекистон халқ артисти – Сора Эшонтўраева бўлган. У Ёдгор Саъдиев, Ойбарчин Бакирова, Муҳаббат Абдуллаева, Саидкомил Умаров сингари элимиз таниган санъаткорлар билан бирга таҳсил олган.

1971 йилда Шукуржон Сапаева “Ҳамза” номидаги драма театрида иш фаолиятини бошлаб, у ерда катта ва кичик образлар яратишга муяссар бўлган. "Парвона"да Юлдуз, "Келинлар қўзғолони"да Нигора ва бошқа кўплаб спектаклларда турфа хил образларни гавдалантирган.

1989 йил театр икки гуруҳга ажралиб, актёрларнинг аксарияти бошқа театрга кетгач, Шукуржон Сапаева Педагоглик фаолиятини бошлаган. Шукуржон Сапаева драматургия билан ҳам шуғулланиб, бир нечта пьесалар ёзган.

“Хивалик полвон”, “Жалолиддин тулпори”, “Излаб”, “Кулча нон”, “Ҳунардан зар унар” каби асарлари Хива, Андижон, Самарқанд ва бошқа вилоятларда намойиш этилган.