Меҳриддин Раҳматовга табрик

Ўзбек Миллий Академик драма театри ва кино актёри, Ўзбекистонда хизмат кўрсатган артист - Меҳриддин Раҳматовни таваллуд топган куни билан табриклаймиз! Саҳна ва экран ҳаётига меҳр-муҳаббати юксак бўлган санъаткоримизга узоқ умр, сиҳат-саломатлик тилаймиз.

Меҳриддин, расмий тилда актёрлик касбини эгаллаган санъаткор. Аслида актёр қалб шифокори, қалб муҳандиси, қалб мусаввири. Саҳна ва экран томошабинга актёр қалбини кўзгу тутади. Юрак дукурини қулоққа элтади. Актёрнинг кўз-нигоҳи ички дунёдан сўзлаш керак. Меҳриддин саҳнада табиий яшайди. Экранда камерани буткул унутиб, қоғоз акс этган хаёлотдаги ҳаётга сингади. Асардаги қаҳрамонни ўз вужудига сингдириш аввало меҳр, сўнгра табиат берган истеъдод ҳамда мароқли меҳнат талаб қилинади. Меҳриддин бу борада томошабинлар меҳрини қозонган.

Меҳриддин Раҳматов ижросидаги тош босадиган роллар талайгина. Бироқ ўзбек томошабини “Туташ тақдирлар” сериалидаги ошиқ рассом йигит Рустам – Меҳридинни ҳамон ўзгача меҳр билан эслашади, намойишда меҳр нигоҳлари билан кузатади. Мухлису томошабинларга завқ билан меҳр улашишдан, ижодий хизмат қилишдан асло ҳормаслиги ва чарчамаслигини тилаб қоламиз!

Умр ва ижод йўллари ҳамиша нур-ёғдуга белансин!

Озода ШОБИЛОЛОВА - Ўзбек Миллий Академик драма театрининг Матбуот котиби.

Маълумот: Ўзбекистон Республикасида хизмат кўрсатган артист - Меҳриддин Раҳматов 1977 йилнинг 4 Август куни Бухоро вилоятида таваллуд топган.

2003 йилдан Ўзбек Миллий Академик драма театрида актёр сифатида фаолият олиб боради.

2010 йили "Ўзбекистон Республикасида хизмат кўрсатган артист” унвони билан мукофотланган. Меҳриддин Раҳматов сахнадаги ижодининг дастлабки йилларидан то шу кунга қадар такрорланмас образлар яратиб театрнинг етук актёрлардан бирига айланди. Меҳриддин Раҳматов - истеъдодли актёр. У ҳамкасбларининг ва нозик таъб томошабинларнинг дилидан жой олган.

Меҳриддин Раҳматов "Алишер Навоий" спектаклида Мўмин Мирзо образини ўзгача бир талқинда яратди. Кейинчалик бу спекталдаги Ҳусайн Бойқаро роли унга ишониб топширилди. Бу энди актёр истеъдодига бўлган ишончнинг белгиси эди. Меҳриддин Раҳматов театр саҳнасида кетма-кет роллар ижро эта бошлади. "Муқаддас Тахтизар"да Спитамен, "Ҳамлет"да Горацио, "Усмон Носир"да маҳбус, Шиллернинг "Макр ва муҳаббат"ида Фердинанд, Шукруллонинг "Ҳасрат боғи"да Мелис, Ж. Жабборовнинг "Нексия"сида Тўхтасин, З. Солиеванинг "Увайсий"ида Мадалихон, Э. Аъзамнинг "Талваса"сида Мелис каби бир қатор ролларни ижро этган.

Меҳриддин Раҳматов тез орада кино ва телевидение режессёрларининг ҳам эътиборига тушди. У "Беҳбудий" тарихий фильмида қизил аскар, "Ўч" видеофильмида Ботир, "Ёдгор"да Хуршид, "Гаройиб аёл"да Имомжон, "Шайтанат"да Ширавой, "Ҳақиқий эркаклар ови"да Акбар, "Фақат ғалаба"да Баҳодир Рустамов, "Қасамёд"да Азизбек, "Туташ тақдирлар"да Рустам, С. Сирожиддиннинг "Яраланган оққуш ноласи”да Нодир, Р. Муҳаммаджоновнинг "Йиғлама қиз”да Абдусаттор, Дельмарнинг "Омон бўлгин, азизим!”да Гарви, У. Азимнинг "Огоҳ бўлинг, одамлар”да Акбар, Ж. Жабборовнинг "Уйқусиз кеча”да Адхам, У. Исмоиловнинг "Рустам”да Рустам, Э. Самандарнинг "Султон Жалолиддин”да Жалолиддин, Э. Аъзамнинг "Талваса”да Мэлс, Фелиппонинг "Тонг албатта отади”да соқчи каби образларни меъёрига етказиб ижро этган.