Рихситилла Абдуллаевга табрик


  Ўзбек Миллий Академик драма театри ва кино актёри, маҳоратли телебошловчи - Рихситилла Абдуллаевни таваллуд топган куни муносабати билан табриклаймиз!
   Рихситилла Абдуллаевга энг аввало, мустаҳкам соғлик, узоқ умр, оилавий тотувлик, бахт-саодат ҳамда ижодий ва ижобий парвозлар тилаб қоламиз.

   Камоли эҳтиром ила - Ўзбек Миллий Академик драма театри ва Muzaffar.uz сайтининг ижодий жамоалари.

   Маълумот учун: Рихсилла Нигматуллаевич Абдуллаев 1978 йилда Тошкент шаҳрида туғилган. Мукофотланмаган. Рихсилла Абдуллаев 1995 йили Маннон Уйғур номидаги Санъат институтининг "Драма ва кино актёрлиги" бўлимига ўқишга кирган. Кейинчалик, шу ўқув даргоҳида магистирлик даражасини олган. Миллий театрда 1999 йилдан буён фаолият юритиб келмоқда У театр ижодий ишларига жуда тез аралашиб кета олган ёш актёрлардан бири. Рихситилла 1999-2020 йиллар оралиғида 40 га яқин спектаклларда турфа образларни яратди. Кичик роллар ижрочисидан бош ролларни қойилмақам этиб ижро этадиган етук санъаткор сифатида шаклланди. Меҳнаткашлиги, тиришқоқлиги ва тинмай ижодий изланиши туфайли унинг истеъдоди ҳозир камолга етган пайтидир. У "Жодугар канизак" спектаклида Жасур, "Энага"да Ғофур, "Бир кошона сирларида" тансоқчи, "Адибни умри”да Ботир, "Усмон Носир"да Володя, "Қирол Лир"да Освальд, "Қаллиқни ўйин"да жарчи, "Тахти зар"да Клит, "Ўтган замон ҳангомаларида" солиқчи, "Ёз туни ғаройиботлари"да Деметрий, "Сеҳрли танбур" танбурчи йигит, "Алишер Навоий"да Алишер Навоий, "Макр ва Муҳаббат"да Ферденант, "Рустам”да Бойтура, "Уйқусиз кеча”да Ботир, "Андишали келинчак"да Арслонбек, "Дадажон демайман"да Алишер, "Чегара устидаги уй"да дипломат, "Тун албатта ўтади"да Эрино, "Увайсий"да Муҳаммадалихон, "Сенга бир гап айтаман”да Бобош, "Тили асалим”да Куёв, "Фариданинг дил дафтари”да Камрон, "Етти фарёд”да йигит, "Бир қадам йўл”да набира, "Пирикоинонт”да Миср шохи, "Қирмиза олма”да Муҳсин, "Муқаддас тахтизар”да Клит, "Ҳалала"да Шариф каби ролларини меъёрига етказиб ўйнаган. Томошабинлар ва ҳамкасбларининг олқишларига сазовор бўлган. Бу унинг ижодий жамоа томонидан қадрланишининг алоҳида белгисидир. У кино ва видеофильмларда ҳам қатор роллар ижро этган. "Жаҳон отин", "Қадаҳ", "Қирқ тоғора", "Севги фариштаси", "Муҳаббат синовлари", "Келгинди куёв, "Сўғдиёна", "Қора кўзлар", "Телба", "Сароб”, "Қалбаки дунё”, "Ҳижрон”, "Жигарбандим”, "Каминанинг оиласи”, "Ичкуёв”, "Айрилиқ”, "Шаддод қиз”, "Соддагина қизалоқ” каби фильмларда тамошабинлар хотирасида муҳрланиб қоладиган роллар яратган. Турфа образларни яратишда алоҳида маҳоратга эга. Унинг яратган образлари ранг-баранглилиги билан ажралиб туради. Рихсилла ташкилий ишларни яхши кўради. Унинг иштироки театрда ўтадиган байрамларга, таваллуд кечалари томошаларига ўзгача бир руҳ касб этади. 2010 йил "Ўзбекистон белгиси” кўкрак нишони билан тақдирланган.