Раъно Ярашевага табрик

Ўзбек Миллий академик драма театри ва кино актрисаси, Ўзбекистон ва Қорақалпоғистонда хизмат кўрсатган артист - Раъно Ярашевани таваллуд топган куни муносабати билан табриклаймиз!

Раъно Ярашевага мустаҳкам соғлик, узоқ умр, оилавий хотиржамлик ва ижод йўлларида улкан зафарлар тилаб қоламиз.

Камоли эҳтиром ила - Ўзбек Миллий академик драма театри ва Muzaffar.uz сайтининг ижодий жамоаси.

Маълумот: Раъно Сайфуллаевна Ярашева 1961 йилнинг 15 Февраль куни Самарқанд вилоятининг Каттақўрғон шаҳрида туғилган. 1985 йилда Тошкент Давлат санъат институтини тугатган.
Ижодий фаолиятини 1984 йилда 23 ёшида бошлаган актриса 20 дан ортиқ турли жанрдаги спектакль ва фильмларда роллар ижро этди.
Миллий театрда 1987 йилдан буён фаолият кўрсатиб келмоқда. 1999 йили "Ўзбекистонда хизмат кўрсатган артист” унвонига сазовор бўлган.
Раъно Ярашева театрда саҳналаштирилган 40 га яқин спектаклларда турли хил образларни ижро этган.
Раъно Ярашева Миллий театрда саҳналаштирилган "Ёрқиной”да Ёрқиной, "Ҳаёт эшик орти”да Табассум, "Жиноят устида ушлансин”да Манзура, "Кулойим”да Анна, "Энага”да аёл, "Бахти қаро келин ёки...”да келин, "Жодугар канизак”да канизак, "Меҳробдан чаён”да Нозик, "Қаллиқ ўйин”да Ҳамрогул, "Сохибқирон Темур” вазирнинг қизи, "Чимилдиқ” ўланчи янга, "Боши қотган ошиқлар”да паришонхотир келин, "Уфқ”да қишлоқ аёли, "Шайтон ва фаришта” Ўғилой, "Омонат дунё”да хотин-қизлар қўмитаси раиси, "Аёлғу”да она, "Қирмизи олма”да совчи она, "Ёз туни ғаройиботлари”да Иппомета, "Нексия”да Норбуви, "Бевалар”да Раъно, "Увайсий”да Нодирабегим, "Андишали келинчак”да Тўйчинисо, "Антиқа қудалар”да япон аёли каби такрорланмас роллари мазмунан чуқурлиги, ижро махоратининг мукаммаллиги, мантиқий талқини билан эътиборга лойиқдир.
Раъно Ярашева бир қатор кинофильмлар ва телефильмларда ҳам ёрқин образлар яратган.
У кўплаб спекталлардаги роллари билан бирга “Кечир”, “Виждон”, “Сеҳрли узук”, “Фериде”, “Ўзимдан ўзимгача”, “Ичкуёв”, “Пойма-пой”, “Қабрдан қайтган умр”, “Сабр”, “Менинг акам бўйдоқ”, “Бевалар”, “Оқпадар”, “Энди дадам бўйдоқ”, “Айрилиқ”, “Кузда гуллаган дарахт”, “Асал ойи” фильмлар, шунингдек “Кўнгил кўчалари” ҳамда “Сабрия” телесериалларида ҳам турли қаҳрамонлар образини гавдалантирган.
Раъно Ярашева Ўзбекистон Ёзувчилар уюшмаси аъзоси. Унинг «Самарқанд соғинчи» (1996 й.), «Сени ташлаб кетолмайман» (1998 й.), «Ҳажр» (2000 й.) шеърий тўпламлари, "Ортимдаги изларим" таржимаи ҳол, хотиралар, қайдлар (2011 й.), «Илоҳий ишқ қиссаси» (2006 й.) насрий асарлари чоп этилган.