МУҲАББАТ МАВЖУД


Жайронлар жуфтига боқар жавдираб, 
Оққуш қанот қоқар оққушни сўраб, 
Дегайман оятлар лабимда титраб..
 - Муҳаббат бор эди, муҳаббат мавжуд.

Дунё бахтли эди бизга қадар ҳам 
Албат бахтли бўлар биздан кейин ҳам, 
Абад юракгуллар очилар там-там:
-   Муҳаббат бор эди, муҳаббат мавжуд.

Кўзимда ёш билан куларман мен ҳам, 
Тиласам муҳаббат тиларман мен ҳам:
Ишқ билан дунёни оларман мен ҳам.
- Муҳаббат бор эди, муҳаббат мавжуд. 

Муҳаббат пойида гул бўлажакмиз, 
Юрак эшигида қул бўлажакмиз, 
Биз муҳаббатлилар эл бўлажакмиз,
-   Муҳаббат бор эди, муҳаббат мавжуд.

Ким айтар Мажнун йўқ, Лайли бўлмагай, 
Йиғладим, кўз ёшим ичган сўлмагай 
Муҳаббат ўлмагай, ҳаргиз ўлмагай,
Муҳаббат бор эди, муҳаббат мавжуд.

ЗУЛФИЯ МЎМИНОВА