Хаёлимдан ўчиролмайман


Сиз қуёшга ўхшайсиз, жоним,
Яқин борсам куйиб кетарман.
Узоқлашсам, соҳибқироним,
Ёруғликсиз яшаб нетарман.

Қанотлари куйган парвона,
Янглиғ сизга интилар юрак.
Нур қўйнида жон берсам, магар,
Қадрим сизга билинса керак.

***

Сени хаёлимдан ўчиролмайман,
Бепарво нигоҳинг кечиролмайман.
Сен дилимда энг севган қушим,
Кўнглимнинг кўшкидан учиролмайман.

Кулган кўзларимнинг қуёши, моҳи,
Қалбим саройининг сарвари, шоҳи.
Сен тонгдаги мунаввар тушим,
Нетай, кунларимга кўчиролмайман.
***
Юрагимга тиғ каби ботди,
Ўзгаларга хушомадингиз.
Қани энди менга бўлсайди,
Илтифоту муҳаббатингиз.

Юрагимга санчдингиз пичоқ,
Гул- лолалар тўкилар қаранг.
Қалбим йиғлар лекин ўзимни
Аранг тутиб турибман аранг.

"Сўнгакларим қирсиллаб синди,
Куйиб кетди бўғин- бўғиним."
Сиз бепарво турибсиз лоқайд,
Кўкка ўрлар ахир тутуним.

Балки мени синамоқ учун
Рашким қўзғаб қўйдингиз атай.
Меҳрим каби рашким ҳам кучли
Бошқачароқ бўлмасам, нетай.

Дерлар, гўё севишганларнинг
Пайванд эмиш юраклари ҳам.
Оғриқларим сезмадингиз- а,
Бўлмадингиз ярамга малҳам.

Ҳар нарсанинг меъёри бордир,
Ҳар нарсанинг бордир ўлчови.
Ортиқча рашк шубҳа, гумондир.
Ортиқча ноз муҳаббат ёви.

Энди ортга бўлмайди қайтиб,
Гул ҳисларга ғуборлар инди.
Тоғ сингари озорларингиз
Кўтариб-да яшайман энди.

Фарида Султон (Ҳусаинова)










Гость, изоҳ қолдирасизми?
Имя:*
E-Mail:


Маълумот