Маҳеш Ананд (1961 – 2019)

Жасади 3 кундан кейин топилган Маҳеш Ананд ёхуд хинд актёрининг фожиали тақдири

Маҳеш Ананд 1961 йил 13 августда Ҳиндистонда туғилган ва ўз фаолиятини жанг санъати устаси сифатида бошлаган. Унинг карате бўйича қора белбоғи бор эди.

Актёр Маҳеш Ананд 90 йилларда ҳинд фильмларидаги салбий роллари билан машҳур бўлган. У фақат иккинчи даражали ролларни ўйнаган. Маҳеш 80-90 йилларнинг кўплаб супер юлдузлари билан ишлаган ва "Шаҳаншоҳ," "Полиция инспектори," "Ғазабланган уч эркак – 2," "Йўлдан адашганлар," "Ўзига ишониш," "Ғолиб" ва бошқа фильмлардаги роллари билан томошабинларга таниш.

У мактаб давридан-оқ рақсга қизиққан ва Болливудда бош ролларни Камол Ҳасан ва Рина Рой ижро этган "Сенга қасамёд қиламан, севгилим" (1982) фильмида фон раққоси сифатида дебют қилган. У ерда суратга олиш пайтида Ринанинг синглиси Баркха Рой билан учрашиб қолиб, танишган ва кейинчалик унга уйланган. Афсуски, бу никоҳ муваффақиятсиз бўлди. Кейинги 4 та никоҳи каби...

Ҳа, Маҳеш Ананд беш марта уйланган. 1987 йилда у гўзаллик қироличаси ва "Miss India International" танлови ғолибаси Эрика Мария Де Соуза билан турмуш қурган. Эрика унга ўғли Тришулни дунёга келтирган, аммо ажрашгандан сўнг, ўғлини олиб, Дубайга кўчиб ўтган ва у ерда яна турмушга чиққан. Бугунги кунда Тришул онаси ва ўгай отаси билан Араб Амирликларида яшайди.

Маҳеш ўғлини жуда яхши кўрарди ва у билан ажрашгандан сўнг ичкиликка ружу қўйган. Балки бу ёмон одат актёрнинг кейинги хотинлари билан ажрашишига сабаб бўлгандир. 1992 йилда у Мадҳу Малҳотра исмли қизга учинчи марта уйланган. Ёшлар оила қуришга шошилганликларини тезда тушунишди. Ананднинг тўртинчи турмуш ўртоғи, актриса – Уша Бачани эди, аммо икки йилдан сўнг улар ҳам ажралишди. Бешинчи ва охирги марта Маҳеш Светлана исмли рус аёли билан бахтини синаб кўрди ва 2015 йилда унга уйланган.

Бироқ бирга яшашнинг иложи бўлмади. Маҳеш Ҳиндистонда, Света Москвада қолди. Маҳешнинг фейсбук саҳифаси том маънода оғриқ ва севги илтижолари билан тўлиб-тошган.

- Оиласиз ҳаёт йўқ, ишонавер, биламан! Мен сени соғинаман ва севаман, азизим! Мен сени сўнгги нафасимгача севаман," - деб Светлана билан бирга тушган суратлари остига тинимсиз изоҳ ёзган.

Яна ўғлидан бир марта бўлса ҳам хабарларига жавоб беришини илтижо қиларди: "Ўғлим, азизим Тришул! Ўлишимдан олдин мени ҳеч бўлмаса бир марта бағрингга бос! Сени қаттиқ яхши кўраман!"

Аммо унинг собиқ рафиқаси ўғлига отаси билан ҳар қандай мулоқотни тақиқлагани, шу сабабли актёр фарзандини кўрмаганини айтишади. Аввалроқ берган интервьюсида Маҳеш Ананд 18 йилдан бери суратга тушмаётгани сабабли молиявий қийинчиликларни бошдан кечираётганини айтган. Шунча йилдан бери у ёлғиз, ишсиз ва пулсиз яшаган.

1997 йилда ўқ жароҳати туфайли у бир ўпкасини йўқотиб, ишдан бўшашга мажбур бўлган. Соғайиб кетганидан кейин эса кинода роль ўйнашни таклиф қилишмади. Актёрни икки синглиси Нита ва Лата уни ўз қарамоғига олиб, акасига ғамхўрлик қилишган. 18 йил давомида улар унга уйи учун ижара ҳақи ва уй тўловларини тўлашган ва ҳар куни озиқ-овқат жўнатиб туришган.

2018 йилда ниҳоят Маҳеш Анандга омад кулиб боқди. Унга Говинда иштирокидаги "Ранг-баранг Рожа" фильмида кичик роль таклиф қилишди. Ўшанда Маҳеш ўзининг Фейсбук саҳифасида шундай деб ёзган эди: "Мен бор-йўғи олти дақиқа экранда намоён бўламан, лекин ишга қайтганимдан бахтиёрман! Умид қиламанки, ҳаммангиз мени илгаригидек қабул қиласизлар."

Қўшнилар актёр яшаган хонадон остонасида овқат олиб кетилмаганини кўргач, Маҳеш суратга тушишга кетган деб ўйлашган. 2019 йилнинг 9 февралида қутилар сони учтага етганида, қўшнилар қоровулдан эшикни тақиллатиб, унинг уйда ёки йўқлигини кўришни сўрашган. Аммо қўнғироқларга ҳеч ким жавоб бермаган. Уйдан аллақачон ёқимсиз ҳид келарди. Воқеа жойига чақирилган полициячилар эшикни очиб, актёрнинг жонсиз танасини топишди.

У ёқилган телевизор олдида диванда ўтирарди. Унинг ёнида овқат солинган ликобча ва бир шиша спиртли ичимлик турарди. Актёр фейсбукдаги битикларининг бирида шундай ёзган: "Мени ҳамма ичкиликбоз деб атайди. Оилам ҳам, дўстларим ҳам йўқ. Фақат бир нарсани айтинг... Ўгай акам қандай қилиб мени 60 миллион рупийга алдаб кетиши мумкин? Нега 300 та фильмда суратга тушганимдан кейин ҳаттоки сувга ҳам пулим йўқ? Менинг бу дунёда бирорта ҳам дўстим йўқ! Бу даҳшат!"

Бизнингча, Болливуднинг етарлича машҳур актёри қаровсизлик ва қашшоқликда шундай аянчли ўлим топгани ачинарли. Бу яна бир бор кино санъати ва саноатининг шафқатсизлигидан далолат беради.

Интернет хабарлари асосида Музаффар МУҲАММАДНАЗАР тайёрлади.