Ўзбекистон халқ артисти - Обид Толипов (1918-1994)

Обид Толипов 1918 йилнинг 7 Ноябрь куни Тошкент шаҳрида туғилган.

А. Н. Островский номидаги театр ва рассомлик санъати институтининг актёрлик факультетини тугатгач, 1937 йилдан то умрининг охиригача Й. Охунбобоев номидаги Республика Ёш томошабинлар театрининг етакчи актёри сифатида фаолият кўрсатган.

Обид Толипов 1941 – 1945 йиллар урушда қатнашиб, эсон-омон она юртига қайтгач, яна ўзининг жонажон театрида меҳнат фаолиятини давом эттирган. Мактаб ёшидаги ўқувчиларни маънавият ва маърифат руҳида тарбиялашда улкан маданий маскан ҳисобланган театр актёр учун гўё иккинчи уй вазифасини ўтаган. У томошабинларга манзур бўладиган, уларга эстетик завқ бағишлайдиган ўнлаб етук образларда намоён бўлиб, санъатда ўз ўрнига эга бўлган.

О. Толипов театрда саҳналаштирилган кўплаб спектаклларда бош ролларни ўйнаган. "Сирли сандиқ"да муаллиф, "Ким айбдор"да Профессор, "Қимирлаган қир ошар"да Ғафлат, "Ҳуснбузар"да Домла, "Қалдирғоч"да Чол, "Донишманднинг ёшлиги"да Конғирбек, "Абдулла Набиев"да Абдулла Набиев, "Оила"да Володя, "Мардлар қиссаси"да Мавлон, "Алеша Пешков"да Алеша, "Ажойиб уруғ"да Чўпон бола, "Фотоннинг ҳалокати"да Саидов, "Ўжар"да Ўжар Мурод, "Ўз уйингдасан"да Чол, "Муса Жалил"да немис зобити каби турли характердаги ранг-баранг образлар О. Толиповнинг Ёш томошабинлар театрида ярим асрдан зиёд муддатдаги изчил ижодий меҳнатининг самарасидир.

Обид Толипов Манзура Ҳамидова, Муҳаббат Йўлдошева, Воҳид Қодиров каби сафдошларидай ёшлар учун мўлжалланган спектаклларда роллар ижро этишга мослашган профессионал актёр эди. Шунинг учун ҳам у фақат ана шундай спектаклларда ажойиб роллар ижро этиб, ёш авлодни эстетик руҳда тарбиялашдек шарафли ишга ўз ҳиссасини қўшганидан, актёрлик санъатидаги ўта нозик ва мураккаб бу соҳада моҳир уста бўлганидан завқланар, фахрланар эди. Болалар билан ишлаш, уларнинг кўнглини топиш учун, фақат истеъдодгагина эмас, балки ўз касбига садоқат, устозлик иқтидорига ҳам эга бўлиш даркордир.

О. Толипов бир неча ўн йиллар давомида Ўзбекистон радиосида ёшларга бағишланган радиоспектаклларда фаол иштирок этган. Видеофильмларда роллар ижро этган. "Ўзбекфильм" киностудиясида ўзбек тилига дубляж қилинган бадиий фильмларда овоз берган. Бутун кучи, тажрибаси ва салоҳиятини Ўзбекистонда театр санъатининг равнақ топиши учун бағишлаган.

О. Толиповнинг ярим асрдан зиёд муддатдаги изчил самарали меҳнати ижобий баҳоланиб, 1980 йилда "Ўзбекистон халқ артисти" ва "Республика халқ маорифи аълочиси" унвонлари билан тақдирланган, уруш қатнашчиси сифатида орден ва медаллар билан мукофотланган эди.

Обид Толипов 1994 йилда Тошкентда вафот этган.