Жонни Левер

Жонни Левер (ҳиндча: जॉनी लीवर, инглизча: Johnny Lever, туғилгандаги исми — Жон Пракаш Рао Жанумала; 1957 йил 14 августда туғилган) — ҳинд актёри ва Ҳиндистон кинематографиясининг энг машҳур комикларидан бири. ўз вақтида Ҳиндистондаги энг биринчи стендап-комиклардан бири бўлган. Левер «Энг яхши комедия роли» номинациясида Filmfare Awards мукофотига ўн уч маротаба номзод қилиб кўрсатилган ва «Муҳаббат азоби» (1997) ҳамда «Рожа куёв» (Dulhe Raja, 1998) фильмларидаги роллари учун икки бор ушбу мукофотга сазовор бўлган. Ижодий фаолияти бошланганидан бери Болливуднинг уч юздан ортиқ фильмларида суратга тушган.
Левер Андхра-Прадеш штатининг Нандьял шаҳрида, «Hindustan Lever Ltd» (HLL) заводи оператори Пракаш Рао Жанумала ва Карунамма Жанумала оиласида, телугу тилида сўзлашувчи насронийлар хонадонида дунёга келган. Кейинчалик оила Мумбайнинг Дхарави харобазорларига кўчиб ўтиб, ўша ерда муқим жойлашган. Унинг она тили — телугу. Левер уч сингил ва икки укадан (улардан бири — Жимми Мозес ҳам актёр ва комик бўлган) иборат кўп фарзандли оиланинг тўнғичидир.
Левер еттинчи синфгача Андхра инглиз ўрта мактабида таҳсил олган, аммо оиладаги молиявий қийинчиликлар сабабли ўқишни давом эттира олмаган. У мактабни тарк этишга қарор қилиб, Мумбай кўчаларида ручка сотиш, Болливуд қўшиқларига рақс тушиб, кино юлдузларига тақлид қилиш каби турли тасодифий ишларда ишлай бошлаган. Шунингдек, у ёшлик йилларини Ҳайдарободнинг эски мавзеларидан бири бўлган Ёқутпурда ўтказиб, ўша ерда комедия ижрочилигининг ўзига хос услубини ўзлаштирган.
«Hindustan Lever Limited» компаниясида ишлаб юрган кезларида у бир нечта раҳбар ходимларга тақлид қилган ва ўша кундан бошлаб ишчилар уни Жон Рао эмас, балки Жонни Левер деб атай бошлашган. Кейинчалик киносаноатга кириб келганида, у айнан шу исмни тахаллус сифатида сақлаб қолишга қарор қилган.
У дастлаб мусиқий шоуларда, ҳажвий томошаларда қизиқчилик қилиб, шуҳрат қозонган.
Унинг биринчи катта гастролларидан бири 1982 йилда Амитабҳ Баччан билан бўлган. Ўзининг шоуларидан бирида актёр Сунил Датт унинг истеъдоди ва салоҳиятини пайқаган ва унга фильмда роль таклиф қилган.
Бу даврда у Шекҳар Капур режиссёрлигида бир нечта реклама роликларида ҳам суратга тушган.
Унинг истеъдоди эътироф этилиб, фильмларда роллар таклифи туша бошлаган ва Жонни ролларни қойилмақом тарзда ўйнаб, режиссёрларнинг эътиборини қозонган.
1984 йилда Сужатҳага уйланган ва уларнинг Жейми ва Жесси исмли икки фарзанди бор.