Болливуд юлдузи – Рекҳа таваллуд топган кун

Рекҳа (асл исми Бҳанурекҳа Ганешан) Болливуд юлдузи бўлиб, ўз истеъдоди билан Ҳиндистон, Шарқ ва бутун дунёни забт этган. Унинг таржимаи ҳоли сирлар ва ғийбатлар билан тўлиб-тошган, аммо муваффақиятсизликларга бардош беришни ва атрофдагиларнинг танқидларига эътибор бермасликни санъаткор ёшлигидаёқ ўрганган. У ҳеч қачон руҳан тушкунликка тушмасликка интилди ва ўз тажрибасини мухлислари билан баҳам кўриб, бир нечта китобларни нашр этган.
Рекҳа 1954 йилнинг 10 октябр куни Ҳиндистоннинг жанубидаги Тамилнад штатида жойлашган Мадрас (ҳозирги Ченнай) шаҳрида туғилган. Қизча актёрлар оиласида ўсган: унинг отаси актёр Гемини Ганешан, онаси телугу тилидаги фильмларда роллар ижро этган актриса – Пушпавалли. Ота узоқ вақт давомида қизига ўз номини
бермаган, чунки у хотини (Рекҳанинг онаси) билан расман никоҳдан ўтмаган эди. Охир-оқибат Гемини оилани тарк этиб, уларни ташлаб кетган.
Болалигида Рекҳа стюардесса бўлишни орзу қилган, аммо онасининг илтимосига кўра 12 ёшида биринчи марта кинода суратга тушган. Қизда дарҳол актёрлик қобилияти борлиги маълум бўлгани учун у дарҳол продюсерлар эътиборига тушган ва унга шартнома тузишни таклиф қилишган. Рекҳа 14 ёшида актрисалик соҳасига асосий эътиборини қаратиш учун мактабни тарк этган. Аммо биринчи роллардан-оқ ҳафсаласи пир бўлган – Рекҳани семизлиги учун танқид қилишган. Қиз тушкунликка тушмади ва йога билан шуғуллана бошлади. Тез орада у керакли натижага эришди.
Рекҳа Болливудда муваффақиятга эришишини мумкинлигини тушунди. Шунинг учун 1969 йилда у ҳинд тилини ўрганди ва талабгир актрисага айланди. У барча тенгдошлари ўқиши, дам олиши, сайр қилиши, ўзи эса кастинглар, синовлар ва фильмларда суратга тушишига тўғри келишини оғирлик қилса-да, келажакда муваффақиятга эришиш учун қабул қиларди. Дастлабки роллари чоғида у доимо йиғларди, чунки унга бемаза овқат беришарди, костюмлар ва тақинчоқларнинг кўплиги эса ўсмирда аллергия келтириб чиқарарди.
1981 йилда "Қул" фильми катта экранларга чиқди. Рекха машъум Тара ролини ўйнади. Болливуднинг "Қасос ўти" дурдонаси орадан 7 йил ўтиб экран юзини кўрди. Режиссёр Ракеш Рошаннинг мазкур фильми Осиёдан ташқарида ҳам машҳур бўлди. Бош роль – Артиини Рекҳа ижро этган. У постановкачи режиссёрнинг бир қатор саҳналарида гримсиз суратга тушиш шартларига рози бўлган. Фильмга Австралиянинг "Эдемга қайтиш" сериали асос қилиб олинди ва фильм хорижий лойиҳанинг муваффақиятли мослашувининг ноёб намуналаридан бирига айланди.
"Севги тармоқлари" – истеъдодли Рекҳа иштирокидаги Ҳиндистоннинг яна бир кинохити. У билан бирга фильмда Митҳун Чакраборти, Мандакини, Амрит Пал ва Житендра каби Болливуд юлдузлари роль ўйнаган.
"Қиморбозлар қироли" фильми ҳам ўз муваффақиятини кутмоқда эди. Унда Рекҳа яна бир бор экранда эҳтиросини мужассамлаштириши керак эди. Унинг роли дастлаб Димпл Кападиага таклиф қилинган, аммо у рад этган ва кейинчалик пушаймон бўлмаган, чунки Акшай Кумар тез орада унинг куёвига айланган.
2003 йилда "Сен ёлғиз эмассан" фильми кинотеатрларда намойиш этилди. Унда Рекҳа Сония Меҳра ролини ижро этган. Фильм Болливуд учун ғайриоддий фантастика жанрига тегишли. "Раққоса" драмаси 2006 йилда прокатга чиқди. Унда инсоннинг ўзига хослиги, унинг иродаси, феъл-атворининг кучлилиги ҳақида фикр юритилади.
"Раққоса" фильмидаги қиз роли муваффақиятсиз чиққандан сўнг, Рекҳа бир муддат экранда кўриниш беришни тўхтатган. Фақат 2010 йилда унинг иштирокида "Чегара билмас севги" фильми экранларга чиқди. Унда Ҳема Малини ва Риши Капур ҳам роль ўйнаган, аммо фильм кассада муваффақиятсизликка учради. Шунга қарамай, ўша йили актриса "Падма Шри" мукофотига сазовор бўлди. 2 йилдан сўнг у Ражя Сабҳи (парламентнинг юқори палатаси) аъзоси этиб тайинланган ва у ерда 6 йил ишлаган.
Кейинчалик Рекҳа кино соҳасига қайтди ва "The Obsession" фильмида суратга тушиш учун шартнома имзолади.
Аммо у ўз хатти-ҳаракатининг сабабларини жамоатчиликка тушунтирмасдан, ушбу лойиҳанинг иш майдончасини негадир тарк этди.
Кейинги уриниши муваффақиятлироқ бўлди – "Супербуви" 2014 йилда Дивали байрами муносабати билан чиқарилган. Сурат томошабинларни қизиқтира олди. Бир йил ўтгач, мухлислар Р. Балканинг "Шамитабҳ" лойиҳасида Рекҳи пайдо бўлганидан хурсанд бўлишди. Бу ерда актриса ўзини ўзи ўйнаган. 2018 йилда MLA комедия фильми чиқди, унда ижрочи иккинчи даражали ролда пайдо бўлган.
Ҳинд актрисаси ёшлигида ҳамкасби ва ижодий сулола вакили, продюсер Меҳбуб Хоннинг асранди ўғли Сажид Хон билан танишган. Йигит ғарбда кўп суратга тушган, у ерда ўсмирларнинг ашаддий мухлиси сифатида шуҳрат қозонган. Ташрифлардан бирида у Рекҳа билан ишқий муносабатда бўла бошлаган. Бироқ бу муносабатлар узоқ давом этмаган. Санъаткорларнинг иш жадвали уларни тез-тез учрашишга имкон бермади.
Бир неча йиллар давомида санъаткор мухлисларини ўзгартириб, тақдирини синаб кўргандек бўлди. У Ёгита Бали билан турмуш қурганига қарамай, суратга олишдаги шериги Митҳун Чакраборти билан енгил муносабатда бўлганини тан олган.
70-йилларнинг охирида барча мухлислар Рекҳа ва Амитабҳ Баччан романини муҳокама қилишган. Амитабҳ ўша пайтда яна бир машҳур ҳинд актрисаси – Жая Бхадурига уйланган эди. Матбуотда Амитабҳ ва Рекҳа бирга сайр қилиб, қўл ушлашиб юрган фотосуратлар пайдо бўлди, аммо хотини эрининг хиёнатини сезмаганга олди.
Бутун мамлакат уларнинг ишқий муносабатларини муҳокама қилишган. Рекҳа уни деб актёр оиласини тарк этмаслигини тушунарди, лекин бир куни Амитабҳ суратга олиш пайтида жароҳат олмагунча муносабатларни давом эттирган. У 6 кун комада ётган, шундан сўнг маҳбубасидан ажралиб, оиласига қайтган.
1990 йилда актриса тадбиркор Мукеш Агарвалга турмушга чиққан. Тўйдан олдин Мукешда ўз жонига қасд қилишга мойиллик бўлган, аммо актриса эрини даволашга қарор қилган. Рекҳа АҚШда ишлаган вақтида турмуш ўртоғи бир неча бор ўз жонига қасд қилишга уринган. Улардан бири фожиа билан тугаган.
Матбуотда Рекҳа танқид ва қоралашга учради – журналистлар уни очиқчасига «Фалокат келтирувчи бева» деб аташган. У ўзининг руҳий жароҳатларини "Қиморбозлар қироли" фильмида роль ўйнаган Акшай Кумар билан ишқий муносабатда бўлиш орқали даволашга ҳаракат қилган. Аммо эр-хотиннинг муносабатига артистнинг севгилиси Равина Тандон аралашган. У Рекҳага уларнинг ёшлари ўртасида катта фарқ борлигини эслатди ва севгилисини тинч қўйишни сўраган. Шундан сўнг Болливуд юлдузининг шахсий ҳаётида сокинлик ҳукм сурди.
Ҳозир Рекҳанинг оиласи – унинг жияни Навид. Улар Мумбайда яшашади. У ерда актрисанинг ҳовуз ва боғи бўлган катта, ҳашаматли уйи бор. Улар билан бирга Рекҳанинг энг яқин дўсти ва котибига айланган Фарзан яшайди.
Санъаткор атроф-муҳит ҳимоячиси. У нафақат ўзининг ерларига ғамхўрлик қилади, балки экологик акцияларда ҳам фаол иштирок этиб келмоқда. 2023 йилда у Vogue Arabia журналининг муқовасида суратга тушди ва ўзининг жозибали гўзаллигини яна бир бор намойиш этди.

Филмографияси:

1970 йил – "Ёмғирли куз"
1973 йил – "Ношукур"
1975 йил – "Чўқинтирган ота"
1977 йил – "Биллур уй"
1981 йил – "Азизим Умрао"
1981 йил – "Чўри"
1984 йил – "Фестиваль"
1986 йил – "Севги тармоқлари"
1988 йил - "Қасос ўти"
1989 йил – "Рафиқа"
1996 йил – "Ўйинчилар қироли"
2003 йил – "Сен ёлғиз эмассан"
2014 йил – "Супер буви"

Рекҳа ҳақида Сиз билмаган қизиқарли маълумот:

Рекҳа (туғилганда: Бҳанурекҳа Ганешан) Ченнайда Гемини Ганешан ва актриса Пушпавалли оиласида туғилган. Ганешан ва Пушпавалли у туғилганда турмуш қурмаган ва Рекҳани бутун болалиги давомида унинг отаси бўлганини тан олишмаган. Аслида, оиланинг молиявий аҳволи ёмонлиги Рекҳани актрисалик фаолиятига ўтиши учун мажбур қилган.
Рекҳанинг битта синглиси, бешта ўгай синглиси ва битта укаси бор; ҳаммаси бир отадан, Гемини Ганешандан.
Рекҳа 1966 йилда телугу тилидаги Рангула Ратнам фильмида актриса сифатида дебют ишини бошлаган. 1969 йилда Каннада фильмида қаҳрамон сифатида роль ўйнаган.
Рекха Бомбейда ўтказган дастлабки ўн йилида сувдан чиққан балиқдек "соқов" эди. Чунки у жанубдан келгани учун ҳиндий тилини билмасди, шунинг учун актёрлар жамоаси билан мулоқот қилишга ҳаракат қиларди. У оғир касал бўлиб ётган онасини доимо соғинарди. У ёшлигида семизлиги учун қатъий парҳезга риоя қилиши керак эди.
У ўзининг оғир йилларини Сими Гаревал билан суҳбатда ёритиб берган.
Рекха анча вақтгача бош қаҳрамон ролларини ўйнай олмаган. Унинг қорамтир кўриниши, дўмбоқ қомати ва фильмларида кийган кийимлари замондошларининг эътиборини ўзига тортмаган. Рекҳа "Анжана" (1976) фильмида Амитабҳ Бачан билан бирга роль ўйнаган ва "Гара" (1978) фильмида зўрлаш қурбони ролини ўйнаганидан кейингина одамлар уни жиддий қабул қила бошлашган.
Актёр Винод Меҳра турмуш ўртоғи билан Калькуттада "турмуш қуриб" уйига қайтгач, Меҳранинг онаси Виноднинг Рекҳага уйлангани учун, ундан ғазабланган. Рекҳа қайнонасининг хоки пойини олиш учун оёғига энгашганда, Виноднинг онаси "Ҳароми, менга ифлос қўлингни теккизма" дея уни итариб юборган. У Рекҳани ҳақорат қилишда давом этган. Винод онаси ва Рекҳа ўртасидаги муаммоларни тинч йўл билан ҳал қилиш учун тинчгина ажрашган.
Бизнесмен Мукеш билан танишганидан бир ой ўтгач, Рекҳа унга турмушга чиққан ва ўзини ўнглаб олган. Бироқ, Рекҳа Мукеш Агарвалнинг сурункали депрессиядан азият чекаётганини билмаган.
Рекҳа ўта рашкчи ва беқарор Мукеш Агарвалнинг жисмоний ва руҳий босимларига дош бера олмаган ва у билан ажрашган. Мукеш Рекха билан турмуш қурганидан атиги етти ой ўтгач, ўз жонига қасд қилган ва матбуот ва кино вакиллари Рекхани эрининг ўлимида айблай бошлашган. Бу давр Рекха ҳаётидаги энг оғир даврлардан бири эди. Аммо ҳар доимгидек, у руҳан устувор бўлиб, ғийбатларга эътибор бермасликка уриниб, ўзини қайта кашф этди.
Актриса ҳайвонларга бефарқ эмас. У уйида бир вақтлар Писти лақабли кучукни боққан. Кучук уй бекасининг ҳақиқий эркатойи бўлган.
Рекҳа сиёсат ва ижтимоий ҳаётда ном қозонган аёлларнинг истеъдоди олдида таъзим қилади. Булар Индира Ганди ва Опра Уинфри.
Машҳур актриса тақинчоқлардан билагузукларни афзал кўради. У шифонли сариларни тўплайди, уларнинг аксарияти олтин кашта билан безатилган.

Интернет хабарлари асосида Музаффар МУҲАММАДНАЗАР тайёрлади.