Истиқлол ва маданият жозибаси

Истиқлол ва маданият жозибаси: Санъат симфониясида ёшлар тарбияси

Мустақиллик — бу нафақат давлатнинг сиёсий ва иқтисодий эркинлиги, балки биринчи навбатда, халқнинг ўз миллий ўзлиги, маданияти, асрий қадриятлари ҳамда санъатини дунё аҳлига чекловларсиз, бор бўй-басти билан намойиш эта олиш бахтидир. Ватанимиз истиқлолининг 35 йиллик қутлуғ тўйида Янги Ўзбекистонда маданият, театр, эстрада ва цирк санъатига кўрсатилаётган юксак эътибор миллат маънавиятини юксалтиришда гўёки ёрқин бир маёқ вазифасини ўтамоқда.

Зеро, буюк файласуфлар айтганидек, санъат ва маданият жамиятнинг маънавий кўзгусидир. Бугун Халқ депутатлари Яккасарой тумани Кенгаши депутати ҳамда пойтахтимизнинг энг ўзига хос ва қувноқ санъат масканларидан бири — Карим Зарипов номидаги республика эстрада ва цирк техникуми жамоаси раҳбари сифатида ишонч билан айта оламанки, туманимизда ёшларнинг маданий дунёқарашини бойитиш ва иқтидорли ёшларни қўллаб-қувватлаш масаласи депутатлик корпусининг доимий диққат марказида бўлиб келмоқда.

Кенгашимиз томонидан ёшлар сиёсати дастурлари доирасида маҳаллаларда маданий-маърифий тадбирлар, ижодий учрашувлар ҳамда ёш авлодни эстетик руҳда тарбиялашга қаратилган фестиваллар тизимли равишда ташкил этилмоқда. Биз фақатгина ижтимоий-иқтисодий масалалар билан чекланиб қолмасдан, ҳар бир ўғил-қизнинг қалбида гўзалликка, санъатга, миллий ифтихор туйғуларига бўлган муҳаббатни уйғотишни мақсад қилганмиз. Зеро, цирк ва эстрада санъати инсон ғайратини, иродасини ва энг асосийси — одамларга қувонч улашиш фалсафасини ўзида мужассам этган жуда нозик соҳадир.

Бизнинг ижодий даргоҳимизда таҳсил олаётган ҳар бир ёш нафақат мураккаб техник триклар ёки мусиқий маҳорат сирларини ўрганади, балки у халқаро ареналарда Ўзбекистон байроғини юксакларга кўтарадиган Ватан фарзанди бўлишга интилади. Яккасарой туманида жорий этилган "маҳаллабай" ишлаш тизими доирасида биз уюшмаган ва алоҳида эътиборга муҳтож ёшларни маданият тўгаракларига, бепул цирк ва эстрада маҳорат дарсларига жалб қилиш орқали уларнинг ҳаёт йўлини ёрқин рангларга тўлдиришга, уларга мотивация беришга ҳаракат қиляпмиз.

Мустақилликнинг 35 йиллик довони — биз маданият ва таълим соҳаси вакиллари ҳамда халқ депутатлари учун улкан маънавий сарҳисоб давридир. Биз бундан кейин ҳам Яккасарой тумани ёшларини ҳам жисмонан бақувват, маънавий етук, санъат ва гўзалликни қадрлайдиган, жаҳон саҳналарида юртимиз номини ёрқин ижроси билан тараннум этадиган комил инсонлар қилиб тарбиялаш йўлида бор кучимиз, қалби амримиз ва профессионал салоҳиятимизни сафарбар этамиз.

Қутлуғ байрам барча юртдошларимизга муборак бўлсин!

Карима ЗАРИПОВА,

Халқ депутатлари Яккасарой тумани Кенгаши депутати, Карим Зарипов номидаги республика эстрада ва цирк техникуми директори.