Леонид Вячеславович Куравлёв (1936

Леонид Вячеславович Куравлёв (1936–2022)

Леонид Вячеславович Куравлёв (1936 йил 8 октябрь, Москва — 2022 йил 30 январь, Москва) — россиялик киноактёр; РСФСР халқ артисти (1977).

Леонид Куравлёв 1936 йил 8 октябрда Москвада «Салют» авиация заводи чилангари Вячеслав Яковлевич Куравлёв (1909–1979) ва сартарош Валентина Дмитриевна Куравлёва (қизлик фамилияси Кораблёва) (1916–1993) оиласида туғилган.

1941 йилда Леониднинг онаси Мурманск вилоятининг Зашеек посёлкасига сургун қилинган, Леонид онаси билан бир неча йил Имандра кўли соҳилида яшаган.

Мактабда Куравлёв ёмон ўқиган. Айниқса, аниқ фанлар: математика, кимё ва физика унга жуда оғир кечган. Актёрнинг ўзи тан олишича, касб танлашига айнан шу омил таъсир кўрсатган. Холасининг қизи кунларнинг бирида ҳазил тариқасида мактабни битиргач ВГИКга (Бутунроссия давлат кинематография институти) ҳужжат топширишни маслаҳат беради — у ерда у ўзи ёқтирмаган фанларнинг бирортасидан ҳам имтиҳон топширмас эди.

1953 йилда Леонид Куравлёв биринчи марта ВГИКга киришга ҳаракат қилади, аммо ўқишга кира олмай, Москвадаги «Оптик» артелига ишга жойлашади.

Кейинги уриниш 1955 йилда бўлиб ўтади; бу сафар у имтиҳонларни муваффақиятли топшириб, ВГИКнинг актёрлик бўлими талабасига айланади ва Борис Владимирович Бибиков курсида таҳсил олади. ВГИКни 1960 йилда тамомлайди, Светлана Дружинина ва Софико Чиаурели каби санъаткорлар унинг курсдошлари бўлишган.

Кинодаги дебютини талабалик йилларида Андрей Тарковский ва Александр Гордоннинг «Бугун жавоб берилмайди…» («Сегодня увольнения не будет…», 1958) фильмида аскар-сапёр Морозов ролини ўйнашдан бошлаган. Бир вақтнинг ўзида ёш актёр Василий Шукшиннинг дипломатик иши бўлмиш «Лебяжьедан хабар қилишмоқда» ва Михаил Швейцернинг «Мичман Панин» саргузашт фильмида суратга тушади (иккала фильм ҳам — 1960 йилда).

Куравлёв ёрқин ва ўзига хос характерли актёр эди.

1960–1992 йилларда Киноактёр театр-студияси труппасида фаолият юритган.

«Оқ тўтиқуш» («Белый попугай») телекўрсатувида иштирок этган.

Актёр кўплаб фильмларда суратга тушган. Ўзбек киноихлосмандларига асосан, 1973 йил тасвирга олинган "Иван Васильевич касбини ўзгартиради" фильмидаги Жорж Милославский роли орқали яхши таниш.

1998–2000 йилларда «РТР» телеканалида китоб янгиликлари ҳақида ҳикоя қилувчи «Леонид Куравлёв билан китоблар дунёси» кўрсатувини олиб борган.

2021 йил ёзидан эътиборан Москвадаги кексалар пансионат-уйида яшаган.

2022 йил 5 январда вирусли пневмония ташхиси билан Коммунаркадаги шифохонога ётқизилган; сўнгра В.В. Миллионшчикова номидаги Биринчи Москва хосписига ўтказилган. Шифокорлар 85 ёшли актёрда аралаш турдаги деменция ҳамда цереброваскуляр касаллик — бош мия қон томирларининг шикастланиши ортиб борадиган ва кислород ҳамда озуқа моддалари етишмаслиги туфайли нейронлар аста-секин ўла бошлайдиган патологик ҳолатни аниқлашган.

2022 йил 30 январда умрининг 86-йилида вафот этди. Троекурово қабристонига турмуш ўртоғи Нина Васильевна ёнига дафн этилган.

Рафиқаси (1960–2012 йилларда) — Нина Васильевна (1939 йил 15 май — 2012 йил 5 апрель), инглиз тили ўқитувчиси, мактабда ўқув ишлари бўйича директор ўринбосари бўлиб ишлаган. Улар биргаликда 52 йил (1960 йилдан 2012 йилгача) умр кечиришган. Улар Леонид ўн олти, Нина эса ўн уч ёшда бўлган пайтлари яхмалак учиб, танишишган. Нина Васильевна етмиш икки ёшда вафот этган, Троекурово қабристонига дафн этилган. Турмуш ўртоғининг вафотидан сўнг Леонид Куравлёв одамларга кўринмай, таркидунёчилик турмуш тарзини олиб борган. Рафиқасининг қабртошига Леонид Вячеславовичнинг ҳам исм-шарифи ўйилган эди.

Қизи Екатерина (1962 йил 6 мартда туғилган), Шчепкин номидаги билим юртини тамомлаган, «Энг жозибали ва жозибадор» («Самая обаятельная и привлекательная») комедиясида (Лариса роли) суратга тушган, дубляж билан шуғулланган. Кейинчалик психотерапевт бўлган. Онасининг вафотидан сўнг отасининг Соҳилдаги уйда жойлашган хонадонида яшаб келмоқда.

Ўғли Василий (1978 йил 14 январда туғилган), ёзувчи Василий Шукшин шарафига номланган. 2000 йилда Москва автомобиль-йўл институтини тамомлаган. Иқтисод фанлари номзоди, 2004 йилдан бери Россия халқлар дўстлиги университетининг муҳандислик факультетида ишлайди.

Набиралари: Степан (2003 й.т.), Фёдор (2007 й.т.), Григорий (2010 й.т.).

Интернет материаллари асосида Музаффар МУҲАММАДНАЗАР тайёрлади.