Солижон Ҳакимовга табрик

Ўзбекистонда хизмат кўрсатган артист, Самарқанд вилоят мусиқали драма театрининг устоз санъаткори — Солижон Ҳакимовни таваллуд топган куни муносабати билан чин дилдан табриклаймиз!

Солижон Ҳакимовга мустаҳкам соғлик, узоқ умр, ижодий ва ижобий ютуқлар тилаймиз!!!

Маълумот: Солижон Турғунович Ҳакимов 1956 йилнинг 22 Август куни Марғилон шаҳрида туғилган. У 1977 йилда Тошкент Давлат Театр ва рассомлик институтининг "Кино ва драма актёрлиги" факулътетини тугатиб, ўз ижодини Самарқанд вилоят Ҳ. Олимжон номидаги ўзбек драма театрида драма актёрлиги вазифаси билан бошлаган.

1989 йилдан 2005 йилгача Фарғона вилояти Юсуфжон қизиқ Шакаржонов номидаги мусиқали драма ва комедия театрида ижод қилган. 2005 йилдан яна Самарқанд вилоят Самарқанд вилоят мусиқали драма театри (Ҳ. Олимжон номидаги давлат драма ва мусиқа театри)да ўз ижодий фаолиятини давом эттирган. У ўтган давр мобайнида турфа ролларни ижро этган, жумладан:

Зиндонбон (“Мирзо Улуғбек”), Башар (“Инсонликка номзод”), Ғофсул Аъзам (“Шум бола”), Йигит (“Эй, ким бор?”), Кичик ўғил (“Шаддод она ва унинг болалари”), Хизматкор (“Тошкентга саёҳат”), Олимтой (“Темир хотин), Эркак (“Тақдир эшиги”), Раҳмат (“Қор одам”), Малай (“Учар табиб”), Ашур (“Кампир топайми, дадажон?”), Эркак (“Аёлларни асранг!”), Ван (“Сичуандан чиққан меҳрибон” ), Достон (“Бир ўлиб кўрай-чи”), Аҳмад Яссавий (“Буюк Темур”), Саид жўра (“Сиртмоқ”), Раис ("Кўчки"), Урхон бобо ("Соҳил бўйлаб чопаётган олапар") каби 50 дан ортиқ роллари томошабинларда катта таассурот қолдирган.

Солижон Ҳакимов "Ўзбекистонда хизмат кўрсатган артист" унвони соҳибидир. У устоз сифатида театрнинг ёш актёрларга санъат сирларини ўргатиб келмоқда.

У 2018 йилда Туркиянинг Конья шаҳрида бўлиб ўтган "Минг нафас бир овоз" Туркий тилларда саҳналаштирилган спектакллар XI-Халқаро театрлар фестивали ҳамда Қозоғистон Республикасининг Остона шаҳрида бўлиб ўтган "Самғау" VI-театрлар фестивалида "Кўчки" спектакли билан иштирок этди. Фестиваллар доирасида ўтказилган маҳорат дарсларида фаол иштирок этиб, тегишли сертификат ва дипломларга сазовор бўлган.