АЁЛ


Малика САЛИМОВА

АЁЛ

Бир оғиз ширин сўз қанотдир унга,
Қушдек учиб кета олади аёл.
Битта томчи бўлса меҳрингиз агар,
Унга чўкиб кета олади аёл!

Сизга келар бўлса ногоҳ бир озор,
Кўксин қалқон эта олади аёл.
Нолимай, жимгина, меҳрингизга зор,
Минг йил бўлса кута олади аёл.

Бу дунё ўткинчи, умр ўткинчи,
Қарашлардан мадор теради аёл.
Ёлғондан бир жонин сўраб кўрингчи,
Қирқ битта жонини беради аёл.

Илҳақ нигоҳида қанча ўтинч бор,
Бир кулинг, ой каби тўлади аёл.
Аёлнинг ажалдан ўлмоғи бекор,
Меҳрга зорликдан ўлади аёл!