ТУГАНМАС БУЛОҚ

ТУГАНМАС БУЛОҚ

Менинг болалигим Сурхондарё воҳасининг тоғли Ваҳшивор қишлоғида ўтган. Агар адашмасам, ўшанда 5-6-синфларда ўқир эдим. Бир кун отам хурсанд бўлиб кириб келди. “Гулхан” журналида менинг шеърларим чиқибди. Бутун шаҳар-у қишлоқларга овоза бўлибди. Келгусида мен зўр шоира бўларканман. Бу гапни отамга қўшни қишлоқдаги муаллим айтибди. Бу гап мени жуда ҳаяжонга солди. Мактабга борсам у ерда ҳам шу гап. Қувончдан осмонларга учдим. Журнални кутубхонадан олиб уйдагиларга, қариндошларга кўрсатдим. Шундан кейин ижодимга жиддий қарай бошладим. “Гулхан” бош муҳаррири, севимли шоирам Ойдин Ҳожиеванинг далда ва ўгитлари қалбимга жуда катта қувват бўлди. Кетма-кет бошқа газета-журналларда ҳам шеърларим чоп этила бошлади. Ўшанда мухлисларимдан беш мингдан ортиқ мактуб олдим. “Гулхан” журнали менинг ҳаётий мақсадларимни, адабий тақдиримни белгилаб берди. Юзлаб дўстлар орттирдим. Ўзимга ўхшаган ёш ижодкорларнинг машқлари билан танишдим, тажриба алмашдим. Гулноза Эрназарова, Нодира Баратова, Наргиз Довурбоева, Асадулла Жўраев, Лола Соипова, Дилфуза Қўзиева... бугун уларнинг кўпчилиги таниқли журналист, адиб ва рассом бўлиб етишдилар. Қисқаси, “Гулхан” журнали бўлғуси ижод аҳли учун бешик, улкан булоқ вазифасини ўтаяпти. Мен бир умр ушбу журнал ва унинг жамоасидан мени кашф этганлари учун миннатдорман.

Гуландом ТОҒАЕВА,

филология фанлари номзоди,

Ўзбекистон Ёзувчилар уюшмаси аъзоси.

Манба: "Гулхан" журнали.

TUGANMAS BULOQ

Mening bolaligim Surxondaryo vohasining tog‘li Vahshivor qishlog‘ida o‘tgan. Agar adashmasam, o‘shanda 5-6-sinflarda o‘qir edim. Bir kun otam xursand bo‘lib kirib keldi. “Gulxan” jurnalida mening she’rlarim chiqibdi. Butun shahar-u qishloqlarga ovoza bo‘libdi. Kelgusida men zo‘r shoira bo‘larkanman. Bu gapni otamga qo‘shni qishloqdagi muallim aytibdi. Bu gap meni juda hayajonga soldi. Maktabga borsam u yerda ham shu gap. Quvonchdan osmonlarga uchdim. Jurnalni kutubxonadan olib uydagilarga, qarindoshlarga ko‘rsatdim. Shundan keyin ijodimga jiddiy qaray boshladim. “Gulxan” bosh muharriri, sevimli shoiram Oydin Hojiyevaning dalda va o‘gitlari qalbimga juda katta quvvat bo‘ldi. Ketma-ket boshqa gazeta-jurnallarda ham she’rlarim chop etila boshladi. O‘shanda muxlislarimdan besh mingdan ortiq maktub oldim. “Gulxan” jurnali mening hayotiy maqsadlarimni, adabiy taqdirimni belgilab berdi. Yuzlab do‘stlar orttirdim. O‘zimga o‘xshagan yosh ijodkorlarning mashqlari bilan tanishdim, tajriba almashdim. Gulnoza Ernazarova, Nodira Baratova, Nargiz Dovurboyeva, Asadulla Jo‘rayev, Lola Soipova, Dilfuza Qo‘ziyeva... bugun ularning ko‘pchiligi taniqli jurnalist, adib va rassom bo‘lib yetishdilar. Qisqasi, “Gulxan” jurnali bo‘lg‘usi ijod ahli uchun beshik, ulkan buloq vazifasini o‘tayapti. Men bir umr ushbu jurnal va uning jamoasidan meni kashf etganlari uchun minnatdorman.

Gulandom TOG‘AYEVA,

filologiya fanlari nomzodi,

O‘zbekiston Yozuvchilar uyushmasi a'zosi.