ОДАМ


Ким уялди қилган ишидан,
Қай юракда уйғонди виждон?
Кимнинг кўзларида бу ҳаёт
Қалқиб турар кўз ёшдек ҳамон.
Ёрдам бергил ҳали кеч эмас!..
Сен ҳеч қачон тош бўлмагансан,
Бегона ҳам, кеч бўлмади, йўқ!
Бўғзигача келганча бари
Тиқилганда аччиқ ҳайқириқ.
Шамол каби даштдан-даштларга
Тоғдан-тоққа урилиб бетин.
Ўзида куч топиб охири
Остонангда урганда бошин.
Эҳтимол, у бу дунёдаги
Дунёсидан айрилган Одам.
Йўл кўп, лек йўл юргиси келмас,
Кўп йўллардан қайрилган Одам.
У ўлишни унутган Одам,
Ёки умри оз қолган Одам.
Ё Тангридан ўзига ҳар кун
Ўлим сўраб олган бир Одам.
У қўмсайди билмайди, афсус,
Сиғинган не бор  -- ўтди мангу.
Ичидаги Худо ҳам ўлди,
Сен тириксан ўлмагансан-ку,
Тақиллатса эшигингни оч!..
Сен бил, у бил ва яна билгил,
Ерда қолмас очилмаган сир.
Тирик қолдирмайди ҳеч бир ғам,
Ҳеч бўлмаса, сен тирик қолдир.
Аямаса ая,
чида, ҳа,
Хоҳлайсанми, мардлик мана, чин!
У йўқотиш олдида турган
Сўнгги умид бўлиши мумкин.
Ким алжиса алжисин, майли,
Фитна ёқса сочаверсин тек.
Чириб кетган ақлингни йиғиб,
Сен яхшилик уруғини эк!..
Кекса авлод янги авлодни
Кутиб олса ҳам кулиб гарчанд,
Янги авлод кекса авлодни
Фақат инкор этиш билан банд.
Ўлиб кетди қанча одамлар,
Дардга тўлдирганча оламни.
Гар қўлингдан  шу ҳам келмаса,
Жим бўл,
ва кет,
тинч қўй Одамни!..

Адиба УМИРОВА










Гость, изоҳ қолдирасизми?
Имя:*
E-Mail:


Маълумот