“ADVOKAT” ЖУРНАЛИНИНГ 20 ЙИЛЛИК ТЎЙИ


     Мамлакатимизда суд-ҳуқуқ тизимини ислоҳ қилиш борасида жуда катта ҳаракатлар бошланган бўлса-да, ҳали ечимини кутаётган муаммолар ҳам етарли. Инсон ҳуқуқлари кафолатланган том маънодаги фуқаролик жамияти қуриш учун жамоатчилик назоратига, демакки, оммавий ахборот воситаларининг ўткир нигоҳига эҳтиёж бор.
     Ўзбекистон Республикаси Адвокатлар палатаси нашри бўлган “Advokat” журнали адвокатлар фаолиятига доир муаммоларни ҳеч қандай назорат ва цензурасиз профессионал даражада ёритишга ҳаракат қилмоқда.
     Бироқ фуқаролар ҳуқуқлари ҳимояси жараёнида адвокатларимиз кунда-кунора дуч келаётган барча муаммоларни тўла қамраб олиш биргина нашр имкониятларига мос ҳажм эмас. Шу боис таҳририят ўзининг 20 йиллик тўйи баҳона ташкил этилган давра суҳбатида ҳуқуқ соҳасида қалам тебратаётган барча журналист ва блогерларни жамлаб, ҳамкорлик бўйича реал таклифларни ўртага ташлашни режалаштирди.
“Advokat” журнали ва www.advokatnews.uz сайти Бош муҳаррири Н.Тошниёзов тадбирда сўзга чиқиб шундай деди:
    - Ҳамкорлигимизнинг илк қадами сифатида эса ҳуқуқ соҳасига ихтисослашган журналистлар, блогерлар ҳамда фаол адвокатлар иштирокида ойда камида бир марта давра суҳбати ташкил этиб, суд-ҳуқуқ соҳасидаги энг долзарб муаммолар муҳокамасини режали асосда йўлга қўйишни таклиф этамиз. Барча ташкилий масалаларни, тадбир ўтказиш жойи таъминотини ҳамда ушбу давра суҳбатлари натижаси ўлароқ ёритилган чиқишларни рағбатлантириб боришни эса Ўзбекистон Республикаси Адвокатлар палатаси ўз зиммасига олади. 
     Бундай давра суҳбатларини қуйидагича йўсинда ташкил этиш мумкин деб ҳисоблаймиз:
— журналистлар ва блогерларнинг суд-ҳуқуқ тизимидаги муаммоларни ёритиш борасида дуч келган саволларига адвокатлар томонидан ҳуқуқий жавоб ва маслаҳатлар берилишига эришиш;
— адвокатларнинг ўз фаолиятида дуч келаётган муаммолари ҳақидаги мисолларга асосланган шарҳларини тинглаш ва уни ОАВда қандай ёритиш борасида ҳамда бунинг аҳамияти хусусида баҳс-мунозара олиб бориш;
— ОАВда чоп этилган аниқ бир мақолалар муҳокама қилиниб, унинг аҳамияти ва муаммони кўтаришда эътибордан четда қолган жиҳатлар борасида фикр алмашиш;
— бир ой давомида эълон қилинган мақола, эшиттириш ва кўрсатувлар орасидан энг яхшиларини танлаб, тақдирлаш учун Адвокатлар палатасига тавсия қилиб бориш ва ҳоказо.
     Яна бир хушхабар — Адвокатлар палатаси бевосита адвокатлар кўтариб чиққан муаммоларни ёритадиган ҳамда мазкур давра суҳбатларида муҳокама қилинганидан сўнг эълон қилинган мақола, эшиттириш ва кўрсатувлар учун қалам ҳақи тўлашни йўлга қўйиш учун грант маблағлари топиш устида ҳам иш олиб бормоқда.
     “Advokat” журнали тарихидаги яхши ва ёмон кунлар ҳақида” журналнинг илк Бош муҳаррири, адвокат, Ўзбекистон Республикаси Адвокатлар палатаси қошидаги Услубий маслаҳат кенгаши раиси, ҳуқуқ фанлари доктори Баҳром Саломов гапириб ўтди.
     Тадбир сўнгида журнал ҳамда Адвокатлар палатаси билан фаол ҳамкорлик қилиб келаётган ОАВлар эълон қилиниб, уларга эсдалик совғалари ҳам улашилди.
       Сўнгра бир пиёла чой устида яна қизғин суҳбатлашилди.

Хонбиби МАХАМОВА, журналист