МЕНИНГ ЖОНИМ - МАРЖОНИМ


 
  Шеър - кўнгилдан чиқиб, кўнгил сари ошиқади. Ижодкорнинг дил дардини тинглар экансиз, у энди сизнинг ҳам кечинмаларингизга, дардингизга айланади. 
  Мунира Рамазонованинг "МЕНИНГ ЖОНИМ - МАРЖОНИМ" номли китобида жамланган шеърларини ўқиб, ижодкорнинг шеърларида юракдан юракка кўчиб ўтадиган туйғуни туясиз. Қалби ёруғ шоира муҳаббатнинг хушнуд дамлари, ҳижрон аламлари, инсоннинг инсонга бўлган муносабатларини куйлайди. Унинг ҳаётга бўлган оташин меҳр-муҳаббати акс этган сатрлар мухлислар кўнглидан жой олади, деган умиддамиз. 

  Муаллиф ҳақида: Мунира РАМАЗОНОВА 1985 йил 10 октябрда Бухоро вилояти Когон шаҳарда туғилган. Ўрта мактабни битиргач, 2004-2008 йиллар ҳамда 2010-2012 йил МРДИнститутининг Санъатшунослик журналистика факультетининг магистратура босқичи таълимини олган. Ҳозирда Ўзбекистон Ёзувчилар уюшмасининг тарихи музейида бошлиқ вазифасини бажаради. Ижод намуналари республиканинг “Ўзбекистон адабиёти ва санъати”, “Ҳуррият”, “Оила ва жамият”, “Гулистон”, “Гулхан” каби матбуот нашрларида чоп этилган. 2017 йил “Дориломон кунлар шукуҳи” номли китоби бадиий-публицистик мақолалар нашр этилган. Туркиянинг “Ўзбек адабиёти” журналидаги махсус нашрда шеърлари чоп этилган.

ОНАЖОНИМ

Соғинаман, сиздан йироқман,
Ёнаётир юрак фироқдан.
Онажоним, бедорман бу кун,
Ҳаёт учун мангу сўроқман.

Айбсиз дейсиз фарзандларингиз,
Ёш бола-да, дейсиз-да бизни.
Ғамингизни тўкмайсиз асло,
Билдирмайсиз ташвишингизни.

Сиз ўзингиз тилим, сўзимсиз,
Сиз ўзингиз меҳр кўзимсиз.
Бу дунёда сизсиз нетай мен,
Сиз ўзингиз менинг ўзимсиз.

Меҳрибоним, беғубор онам,
Ғамхўргинам, беозор онам.
Дили озор топган соғинчдан,
Йироқларда менга зор онам.

Истадингиз, инсон бўлдим мен,
Ватан учун қалқон бўлдим мен.
Курашяпман элим-юртим деб,
Шу Ватанга қурбон бўлгум мен.

ОТАЖОНИМИЗ

Фарзандлар йўлида қувониб, ғам еб,
Оёққа қўйдингиз гоҳо йиқилсак.
Сочингиз оқарди болаларим деб,
Ҳозирсиз, отам, деб сизни чақирсак.

Дегаймиз, биз учун умрингиз азиз,
Омон бўлинг, отажонимиз!
Нурли чеҳра билан яшайсиз дилда,
Бахтлимиз гоҳ ҳаёт хушнуд боққан кез.

Гар тупроқ бўлсак-да, сиз босган йўлда,
Демакки, бизнинг ҳам умримиз азиз.
Дегаймиз, биз учун умрингиз азиз,
Омон бўлинг, отажонимиз!

ВАТАН

Туғилдим шу азиз юртда,
Фидо унга тану жоним.
Ошиғингман, ошиғингман,
Эй гуландом, Ватанжоним!

Қирда қирмиз чиройинг бор,
Кўкда ёнган шамси анвор,
Ҳар гул айтар Ҳақдан ахбор,
Ҳақдан салом, Ватанжоним.

Тоғлар томон сафар қилдим,
Руҳимни музаффар қилдим.
Умримни сарбасар қилдим –
Хуш, саранжом, Ватанжоним.

Қаро қошинг, менгинг бўлсам,
Бўйинг бўлсам, энинг бўлсам,
Ўлганда ҳам сенинг бўлсам,
Ўлмам тамом, Ватанжоним!

ПОК СЕВГИ

Чирой очганида ранг-баранг гуллар,
Жамоли юракни мастона қилар.
Дунёда чин севги тантана қилар,
Чин севгига жоним фидо қилурман!

Ҳув баланд тоғлардан келур хуш садо,
Сеҳргар булбулми айлаган наво?
Қушларнинг чуғури тинмайди асло,
Мен севгига жоним фидо қилурман!

ҚАНДАЙ УНУТАМАН

Менинг қалбим ёнаётир, қуёшга бер,
Етим қолган умидимни бардошга бер,
Гарди кетсин, дунёларни кўз ёшга бер,
О, муҳаббат, сени қандай унутаман?!

Қароқларинг қутқусида қайғуларим,
Мунгли-мунгли куйлайди дил чолғуларим,
Эй, сиз менинг шабнамдайин туйғуларим,
О, муҳаббат, сени қандай унутаман?!

Пири комил, кечар бўлдим садойимдан,
Тоғлар қалқиб кетмасалар нидойимдан,
Бир нурли ишқ тилаб беринг Худойимдан...
О, муҳаббат, сени қандай унутаман?!

Фақат сенга сўзлайман дил ярасидан,
Одам излаб одамларнинг орасидан,
Нетай, кетгим келса тошлар орасидан,
О, муҳаббат, сени қандай унутаман?!

СЕВГИ ЎЗИ НИМА?

Севги ўзи нима,
Билмадим ҳамон.
Балки бу қувончдир,
Балки бу ҳижрон.

Нечун севдим сени,
Ақлим лол гоҳи.
Севгимга сабабми
Маъюс нигоҳинг.

Тунги лаҳзаларим
Бедор ўтарди.
Кўзларим йўлингда,
Интиқ кутардим.

Нечун ташлаб кетдинг,
Нечун алдадинг?
Жоним, сени севдим,
Фақат сен дардим...

* * *
Хотиранг қалбимда, ишон, мангудир,
Сенсиз шодликларим, мунгдир, қайғудир.
Охир айтар сўзим фақат сенгадир,
Унута олмасман сени ҳеч қачон.

Қор ёғса, юрагим энтикиб кетар,
Сен севган куйларни тинглайман, нетай.
Сени қўмсаб гўзал ҳаёт ҳам ўтар,
Унута олмасман сени ҳеч қачон.

Сендадир ўйларим, сенда хаёлим,
Орзую армонга қалбим тўлган лим.
О, фақат ўзимга аёндир ҳолим,
Унута олмасман сени ҳеч қачон.

Тақдир чархпалаги тинмай чарх урар,
Бетакрор юлдузлар тўхтамай юрар.
Танамда бу юрак, айт, қандай урар,
Унута олмасман сени ҳеч қачон.

Самога қарасам ёдимга тушар,
Илк бора севганим, куйиб-ёнганим,
Сокин хаёл суриб кўл соҳилида,
“Илк бора” куйини илк бор чалганим.

Ширин хотиралар вужудим чўлғаб,
Ушбу битикларни сенга атадим.
Сен ҳамон ҳаётсан, тириксан дея,
Оғриган юракни аста алдадим.
Унута олмасман сени ҳеч қачон.

ҲАМОН ЁДИМДАСИЗ

Бир йилки, яшадим севгингиз билан,
Қизиғи қолмади ўзга дунёнинг.
Ўзимни ҳар куни ўтга ташладим,
Сиз ҳам бир бор менинг ишқимда ёнинг.

Бир йилки, ҳар куни эслайман сизни,
Бу нотинч тириклик бунча беомон.
Бир йилки, сиз фақат хаёлимдасиз,
Бу хаёл кетади яна сиз томон.

Сездимки, қулайди пахса деворлар,
Тераклар бир-бирин топар бир йилда.
Сиздан менга фақат келди озорлар,
Барибир севаман сизни чин дилдан.

МЕН СИЗНИ ИЗЛАЙМАН

Мен сизни излайман, излайман ҳамон
Боғларни, тоғларни садо қучганда.
Аск-садо келади, кутгил, келурман
Нафис чучмомалар чирой очганда.

Мен сизни излайман, мурғак қалдирғоч
Илк бор само узра ёйганда қулоч,
Изладим боғларга солиб гулдирос,
Билмам қайлардасиз, келмайди овоз.

Кутарман, майлига, гулласин дарахт,
Умидим сўнмасин, руҳ олсин мадад,
Мен сизни излайман, қалбим ошнаси,
Ва бир кун учрашиб қолармиз, албат.

АЁЛ ҚАЛБИ

Аёл қалби гул каби нозик,
Банд-бандидан узмангиз ногоҳ,
Бироқ қалби уммондек чексиз,
Пок дил билан ташлангиз нигоҳ.

Олиб берманг дунё молини,
Сўранг аввал ҳол-аҳволини,
Меҳр ила муҳаббат беринг,
Фидо қилар сизга жонини.

Рўзғорим, деб авайланг уни,
Соғлом бўлса, бахт ҳам ўшадир,
Аёл нотинч, ғамларга ботса,
Бу уй, билинг, бахтсиз гўшадир.

Аёл сабру тоқат тимсоли,
Буюк қудрат яшар қалбида,
Лекин бардош беролмас асло
Хиёнатнинг кичик зарбига.

***

ONAJONIM

Sog‘inaman, sizdan yiroqman,
Yonayotir yurak firoqdan.
Onajonim, bedorman bu kun,
Hayot uchun mangu so‘roqman.
Aybsiz deysiz farzandlaringiz,
Yosh bola-da, deysiz-da bizni.
G‘amingizni to‘kmaysiz aslo,
Bildirmaysiz tashvishingizni.
Siz o‘zingiz tilim, so‘zimsiz,
Siz o‘zingiz mehr ko‘zimsiz.
Bu dunyoda sizsiz netay men,
Siz o‘zingiz mening o‘zimsiz.
Mehribonim, beg‘ubor onam,
G‘amxo‘rginam, beozor onam.
Dili ozor topgan sog‘inchdan,
Yiroqlarda menga zor onam.
Istadingiz, inson bo‘ldim men,
Vatan uchun qalqon bo‘ldim men.
Kurashyapman elim-yurtim deb,
Shu Vatanga qurbon bo‘lgum men.

OTAJONIMIZ

Farzandlar yo‘lida quvonib, g‘am yeb,
Oyoqqa qo‘ydingiz goho yiqilsak.
Sochingiz oqardi bolalarim deb,
Hozirsiz, otam, deb sizni chaqirsak.
Degaymiz, biz uchun umringiz aziz,
Omon bo‘ling, otajonimiz!
Nurli chehra bilan yashaysiz dilda,
Baxtlimiz goh hayot xushnud boqqan kez.
Gar tuproq bo‘lsak-da, siz bosgan yo‘lda,
Demakki, bizning ham umrimiz aziz.
Degaymiz, biz uchun umringiz aziz,
Omon bo‘ling, otajonimiz!

VATAN

Tug‘ildim shu aziz yurtda,
Fido unga tan-u jonim.
Oshig‘ingman, oshig‘ingman,
Ey gulandom, Vatanjonim!
Qirda qirmiz chiroying bor,
Ko‘kda yongan shamsi anvor,
Har gul aytar Haqdan axbor,
Haqdan salom, Vatanjonim.
Tog‘lar tomon safar qildim,
Ruhimni muzaffar qildim.
Umrimni sarbasar qildim –
Xush, saranjom, Vatanjonim.
Qaro qoshing, menging bo‘lsam,
Bo‘ying bo‘lsam, ening bo‘lsam,
O‘lganda ham sening bo‘lsam,
O‘lmam tamom, Vatanjonim!

POK SEVGI

Chiroy ochganida rang-barang gullar,
Jamoli yurakni mastona qilar.
Dunyoda chin sevgi tantana qilar,
Chin sevgiga jonim fido qilurman!
Huv baland tog‘lardan kelur xush sado,
Sehrgar bulbulmi aylagan navo?
Qushlarning chug‘uri tinmaydi aslo,
Men sevgiga jonim fido qilurman!

QANDAY UNUTAMAN

Mening qalbim yonayotir, quyoshga ber,
Yetim qolgan umidimni bardoshga ber,
Gardi ketsin, dunyolarni ko‘z yoshga ber,
O, muhabbat, seni qanday unutaman?!
Qaroqlaring qutqusida qayg‘ularim,
Mungli-mungli kuylaydi dil cholg‘ularim,
Ey, siz mening shabnamdayin tuyg‘ularim,
O, muhabbat, seni qanday unutaman?!
Piri komil, kechar bo‘ldim sadoyimdan,
Tog‘lar qalqib ketmasalar nidoyimdan,
Bir nurli ishq tilab bering Xudoyimdan...
O, muhabbat, seni qanday unutaman?!
Faqat senga so‘zlayman dil yarasidan,
Odam izlab odamlarning orasidan,
Netay, ketgim kelsa toshlar orasidan,
O, muhabbat, seni qanday unutaman?!

SEVGI O‘ZI NIMA?

Sevgi o‘zi nima,
Bilmadim hamon.
Balki bu quvonchdir,
Balki bu hijron.
Nechun sevdim seni,
Aqlim lol gohi.
Sevgimga sababmi
Ma'yus nigohing.
Tungi lahzalarim
Bedor o‘tardi.
Ko‘zlarim yo‘lingda
Intiq kutardim.
Nechun tashlab ketding,
Nechun aldading?
Jonim, seni sevdim,
Faqat sen dardim...

* * *
Xotirang qalbimda, ishon, mangudir,
Sensiz shodliklarim, mungdir, qayg‘udir.
Oxir aytar so‘zim faqat sengadir,
Unuta olmasman seni hech qachon.
Qor yog‘sa, yuragim entikib ketar,
Sen sevgan kuylarni tinglayman, netay.
Seni qo‘msab go‘zal hayot ham o‘tar,
Unuta olmasman seni hech qachon.
Sendadir o‘ylarim, senda xayolim,
Orzu-yu armonga qalbim to‘lgan lim.
O, faqat o‘zimga ayondir holim,
Unuta olmasman seni hech qachon.
Taqdir charxpalagi tinmay charx urar,
Betakror yulduzlar to‘xtamay yurar.
Tanamda bu yurak, ayt, qanday urar,
Unuta olmasman seni hech qachon.
Samoga qarasam yodimga tushar,
Ilk bora sevganim, kuyib-yonganim,
Sokin xayol surib ko‘l sohilida,
“Ilk bora” kuyini ilk bor chalganim.
Shirin xotiralar vujudim cho‘lg‘ab,
Ushbu bitiklarni senga atadim.
Sen hamon hayotsan, tiriksan deya,
Og‘rigan yurakni asta aldadim.
Unuta olmasman seni hech qachon.

HAMON YODIMDASIZ

Bir yilki, yashadim sevgingiz bilan,
Qizig‘i qolmadi o‘zga dunyoning.
O‘zimni har kuni o‘tga tashladim,
Siz ham bir bor mening ishqimda yoning.
Bir yilki, har kuni eslayman sizni,
Bu notinch tiriklik buncha beomon.
Bir yilki, siz faqat xayolimdasiz,
Bu xayol ketadi yana siz tomon.
Sezdimki, qulaydi paxsa devorlar,
Teraklar bir-birin topar bir yilda.
Sizdan menga faqat keldi ozorlar,
Baribir sevaman sizni chin dildan.

MEN SIZNI IZLAYMAN

Men sizni izlayman, izlayman hamon
Bog‘larni, tog‘larni sado quchganda.
Ask-sado keladi, kutgil, kelurman
Nafis chuchmomalar chiroy ochganda.
Men sizni izlayman, murg‘ak qaldirg‘och
Ilk bor samo uzra yoyganda quloch,
Izladim bog‘larga solib guldiros,
Bilmam qaylardasiz, kelmaydi ovoz.
Kutarman, mayliga, gullasin daraxt,
Umidim so‘nmasin, ruh olsin madad,
Men sizni izlayman, qalbim oshnasi,
Va bir kun uchrashib qolarmiz, albat.

AYOL QALBI

Ayol qalbi gul kabi nozik,
Band-bandidan uzmangiz nogoh,
Biroq qalbi ummondek cheksiz,
Pok dil bilan tashlangiz nigoh.
Olib bermang dunyo molini,
So‘rang avval hol-ahvolini,
Mehr ila muhabbat bering,
Fido qilar sizga jonini.
Ro‘zg‘orim, deb avaylang uni,
Sog‘lom bo‘lsa, baxt ham o‘shadir,
Ayol notinch, g‘amlarga botsa,
Bu uy, biling, baxtsiz go‘shadir.
Ayol sabr-u toqat timsoli,
Buyuk qudrat yashar qalbida,
Lekin bardosh berolmas aslo
Xiyonatning kichik zarbiga. 










Изоҳлар 2
  1. Pu’lat

    Қаердан олиб ўқисам бўлади китобингизни?

  2. Furqat
    Талант,ижодизга омад тилайман!
Гость, изоҳ қолдирасизми?
Имя:*
E-Mail:


Маълумот