"Нотиқлик санъати академияси" номинация ғолибларини тақдирлади.


 

     Жорий йилнинг 4 октябрида Давлатимиз Раҳбари Шавкат Мирзиёев томонидан “Ўзбекистон Республикасининг “Давлат тили ҳақида”ги қонуни қабул қилинганинининг ўттиз йиллигини кенг нишонлаш тўғрисида”ги қарори ва бу муҳим сана муносабати билан она тилимизнинг жамиятдаги ўрни ва нуфузини ошириш, она тилимизнинг тарихий илдизларини чуқур ўрганиш бўйича кенг кўламли ишлар амалга ошириш белгиланган оммавий маънавий-маърифий чора-тадбирлар дастури қабул қилинган эди.
     Айтиш жоизки, тилимизга давлат мақоми берилган ўтган 30 йиллик давр мобайнида тил байрами илк бора шу қадар юксак даражада, катта эҳтиром ва обрў билан ўтказилмоқда. Токи, давлат тили – сиёсий, ижтимоий ва маданий соҳаларда халқни бирлаштирувчи қудратли восита бўлиб, давлатнинг чинакам рамзи саналади.
     Сайёрамизда аҳоли 7111 та тилда мулоқот олиб борар экан, улар орасида қўшни давлатлар билан қўшиб ҳисоблаганимизда 40 миллиондан ортиқ киши ўзбек тилида сўзлашиши қалбимизга катта ғурур ва ифтихор бағишлайди. Она тилимизда сўзлашувчилар сони кўплигига кўра сайёрамизда энг кенг тарқалган 40 та тилдан бири эканлиги ҳам бизни чексиз қувонтиради.
Охирги йилларда ўзбек тили тобора кўпроқ мамлакатлар олий ўқув юртларида ўрганилмоқда. Бугун жон тилимиз фақат Ўзбекистоннинг давлат тили бўлибгина қолмай, қўшни Афғонистоннинг ҳам расмий тилларидан бири ҳисобланади. Унинг шимолидаги саккизта вилоят аҳолисининг катта қисмини ўзбеклар ташкил қилади.
     Расмий маълумотларга кўра, қўшни Қирғизистоннинг 15 фоиз, Тожикистон 13 фоиз, Туркманистоннинг 6 фоиз, Қозоғистоннинг 4 фоиз аҳолиси ўзбек тилида гаплашади. Бундан ташқари, Россия, Туркия, АҚШ, Хитой, Эрон, Швеция, Латвия, Украина ва Мўғулистон сингари мамлакатларда ҳам ўн минглаб миллатдошларимиз истиқомат қилади.
     Шу билан бирга глобаллашув шароитида миллий тилларга ташқи босимларнинг ортиб бораётгани ҳам ҳақиқатдир. Ҳар икки ҳафтада Ер юзида битта тил умуман йўқолиб кетаётгани ҳам барчамизни ташвишга солмай қўймайди.
     Шу муносабат билан 19 октябрда Республика Маҳалла кенгашида Ўзбекистон Ёзувчилар уюшмаси, Журналистлар ижодий уюшмаси, Республика маънавият ва маърифат маркази, Истеъмолчилар ҳуқуқларини ҳимоя қилиш Федерацияси ва “Нотиқлик санъати академияси” нодавлат ташкилоти билан ҳамкорликда узоқ йиллардан буён ёшларни она тилимизга садоқат ва муҳаббат руҳида тарбиялаш, ўзбек тилини халқаро майдонда тарғиб қилиш ишига, унинг тараққиётига улкан қўшаётган ва жонбозлик кўрсатаётган, юксак нотиқлик маҳорати билан давлатимизнинг барча соҳалардаги сиёсатини халқимиз орасида кенг ва фаол тарзда етказиб бераётган бир гуруҳ жамоат арбоблари, таниқли олимлар, ёзувчи ва шоирлар, теле- ва радио журналистларни жамоатчилик томонидан кенг тарзда тақдирлаш маросими бўлиб ўтди.
Мазкур тадбирнинг яна бир аҳамиятли томони шундаки, шу вақтда қадар тақдирлаш ва мукофотлаш маросимларида нодавлат-нотижорат ташкилотлари алоҳида ташаббус билан чиқмас ва фаоллиги кузатилмас эди. Эндиликда уларда ҳам ислоҳотлар жараёнларига, жамиятдаги энг оғриқли ва ўткир масалалар бўйича ташаббускорлик руҳи қарор топганини тасдиқлайди. “НОТИҚЛИК САНЪАТИ АКАДЕМИЯСИ” таълим муассасаси ана шу хайрли, маърифий ҳаракатга бош қўшгани, она тилимиз, нутқий маҳорат бўйича эътиборга молик бўлган фидойи ва фаол ватандошларимизни номинациялар бўйича рағбатлантиришга жазм этгани олқишланарлидир.
     Тадбирда Акмал Саидов, Расул Кушербаев, Шерзод Қудратхўжаев, Қодир Маҳсумов (марҳум), Нуриддин Ҳаликназаров, Бобоқул Тошев, Саодат Боймирзаева, Феруза Муҳиддинова, Аваз Охун, Нажот Нур, Жаҳонгир Саримсоқов, Хушнудбек Худойбердиев, Нуриддин Норматов, Хосият Рустамова каби давлат ва жамоат арбоблари, депутатлар, ҳуқуқшунос, журналистлар, сўз усталари, нотиқлар, интернет блогерлар, диний соҳа мутасаддилари йил давомида ўзбек тилини тарғиб этиш ва она тилида қатор таъсирлик чиқишлари бўйича турли номинацияларга лойиқ кўрилди.
"Нотиқлик санъати академияси" нутқ борасида фаол ҳаракатда бўлган номинация ғолибларини тақдирлади. "Давлат тили ҳақида"ги қонун муносабати билан президентимизнинг қабул қилган қарорларининг ижроси ҳаммамизга мажбурият бурчини ҳамда масъулият ҳиссини юклаши тайин.
Бугун "Нотиқлик санъати академияси" ҳамкор ташкилотлар билан ўтказилган тадбирда тил тактикаси тараққиёт стратегиясининг таъсирчан ва инновацион механизми рукнида турли номинациялар ғолибларини тақдирлади. Республика Маҳалла хайрия жамғармасининг катта мажлислар залида ўтган тадбирда Олий мажлис сенати аъзолари ва депутатлари ҳамда маҳалла фаоллари иштирок этишди.

Филология фанлари номзоди, доцент, нотиқ, ТИҚХММИ матбуот хизмати раҳбари - Раҳимбой Жуманиёз