Тоғлардек баланд бўл!


 

     Ўзбек Миллий Академик драма театри ижодкорлари яна бир ажойиб спектаклни саҳнага олиб чиқишди. Қўчқор Норқобил қаламига мансуб ушбу асарда замон қаҳрамони образи яратилган. Оғир саноат, кон-металлургия соҳасида узоқ ҳаётий тажриба ва чуқур ҳаётий билимга эга инсон тақдири тўлақонли талқин қилинган. Мамлакатимизга хорижий инвестиция олиб кириш, кон-металлургия тизимини замонавий технологиялар билан таъминлаш, етук малакали миллий кадрларни шакллантириш масаласи асарда асосий йўналиш қилиб белгиланган. Драмадаги замон қаҳрамони шу соҳани ривожлантириш учун барча турмуш қийинчиликлари ва тақдир зарбаларига собит туриб, матонат билан курашади.
     Асарда энг оғир ҳаётий йўлни босиб ўтиб раҳбар лавозимига эришган инсоннинг поклик, замондошларига нисбатан меҳр-муррувват кўрсатиш, халқ ва юрт бойлигини кўз қорачиғидек асраш, коррупция ва талон-тарожликка йўл қўймаслик учун олчоқлик ва турли зуғумлар олдида иродаси синмасдан жасорат кўрсатиши чуқур таҳлил қилинган. Асарда оддий юртдошларимиз ҳаёти ва бугунги адолатли раҳбар кадрларимизнинг юрт фаровонлиги йўлидаги фидойилиги таъсирли саҳналар орқали очиб берилган. Драмада бир сўз билан айтганда, замон қаҳрамони образи қиёфаси инсон дарди ва қалб изтироблари орқали акс эттирилган. Асарда инсон қисмати ва матонатли ҳаёт йўли ифодаланган.
     Спектални ёш режиссёр Ғофур Мардонов саҳналаштирган. Барча санъат ихлосмандларини Ўзбек Миллий академик драма театрига “Тоғлардек баланд бўл” спектаклини томоша қилишга таклиф этамиз.