От минган аёл


“СЕНИ КУЙЛАЙМИЗ ЗАМОНДОШ”

 

     Куни кеча Қорақалпоғистон Республикаси Нукус шаҳрида ўтказилган “Сени куйлаймиз замондош” Ўзбекистон театрларининг V Республика кўрик-фестивалида Фарғона вилоят мусиқали Драма театри жамоаси ҳам фаол иштирок этди. Феcтивалда Комил Ҳамроев асари асосида режиссёр Обид Абдуллаев томонидан саҳналаштирилган “От минган аёл” спектакли намойиш этилди.
     Ўзбекистон замини серсаҳоват. Халқимизнинг эса ерга меҳри ўзгача. Бугунги кунда ўз нафси, манфаати йўлида буйруқбозлик, қоғозбозлик, порахўрлик билан иш тутаётган “Оёғи ердан узилган” раҳбарларнинг заҳматкаш деҳқон фермерларимизнинг ҳалол меҳнатларини менсимай, уларга кўрсатаётган ноҳақ қилмишларини очиб бериш, бунинг натижасида кўп азият чекаётган меҳнаткашларнинг дарду аламларини оммага етказиш, ушбу муаммоларга қайсидир маънода ечим топилишида ҳисса қўшиш асарнинг асосий ғояси этиб белгиланган.
     Ушбу спектакль қишлоқ хўжалиги муаммолари ва фермерлик ҳаракатини ўз зиммасига олган аёл ҳақида. Ўқитувчи Гулбаҳор Умарованинг бошига оғир мусибат тушади. У турмуш ўртоғи фермер Муроджондан айрилиб, унинг фермерлик ишларини ўз зиммасига олади. Туман қишлоқ хўжалиги бўлими бошлиғи Жаббор Зухурович Муроднинг ўлганидан фойдаланиб, унинг ерларини тортиб олишга уринади. Лекин ҳаракатлари бесамар кетади. Гулбаҳор унга қаттиқ қаршилик қилади. Бундан аламзада бўлган Жаббор эса сохта фермер Сўрайё ва бошқа ҳамтовоқлари ёрдамида унга қарши туҳмат ва иғволар тарқатади.
     Ҳокимиятда Жаббор билан Гулбаҳор ўртасида тортишув юзага келади. Гулбаҳорнинг қатъиятини, шижоатини тўғри англаган ёш ҳоким Файзулла Жўраевич унга ёрдам беради. Отдан тушса ғам эгардан тушмайдиган Жаббор Зухурович ўша ерларни тортиб олиш учун курашса-да, аммо унинг қўлидан ҳеч нарса келмайди. Ҳақиқат қарор топади. Гулбаҳор бу курашда ғолиб чиқади. Ёш ҳоким Файзулла Жўраевич ҳамма нарсадан хабардор бўлгач, Жабборни мансабидан бўшатади. Жаббор Сурайё ва Собирнинг кирдикорлари фош бўлиб, улар кўп жиноятлари сабаб қамоққа олинадилар.
Спектакль томошабинларни меҳнаткаш инсонларни қадрлаш, ерни эъзозлаш ва ҳалол меҳнат орқали халққа хизмат қилишга чорлайди.
     Ушбу спектакльдаги воқеалар ижодкорлар томонидан моҳирона равишда очиб берилди. Шу муносабат билан Нукус шаҳрида ўтказилган кўрик-фестивалда “От минган аёл” спектакли саҳналаштирувчи режиссёр Обид Абдуллаев “Энг яхши режиссёрлик иши” номинацияси бўйича, саҳналаштирувчи рассом Фурқат Қўчқоров “Энг яхши сценография иши” номинацияси бўйича ғолибликни қўлга киритиб Дипломга сазовор бўлдилар. Бундан ташқари, жамоа аъзолари Қорақалпоғистон Республикаси Вазирлар Кенгашининг Ташаккурномалари билан тақдирландилар.
     Биз ҳам жамоа аъзоларини самарали меҳнатларида ижодий изланишларида омадлар тилаймиз.

 

Маъруфа СОЛИЕВА,
“Муштум” журналининг махсус мухбири