Шоир таваллудининг 65 йиллиги


     Тошкент вилоят, Ўрта-Чирчиқ туманидаги 65-умумий ўрта таълим мактабида Ўзбекистон халқ шоири - Муҳаммад Юсуф таваллудининг 65 йиллигига бағишланиб тадбир ўтказилди. "Zo'r Тасвир" журналининг Бош муҳаррири - Севдора Латипова томонидан ташкиллаштирилган мазкур адабий кечага шоирнинг рафиқаси, "Олтин қалам" газетаси Бош муҳаррири, шоира - Назира Саломова, Ўзбекистонда хизмат кўрсатган маданият ходими, шоир - Бобур Бобомурод, актриса - Зуҳра Солиева, хонанда - Ирода Дилроз ва бошқалар ташриф буюришди. Мактабга кираверишда ўқувчилар кутиб олишга шай бўлиб қатор туришгани, ичкаридаги стол устида Муҳаммад Юсуфнинг сурати ва китоблари қўйилгани, томоша залида эса саҳнанинг безатилиши мактаб маъмуриятининг тадбирга масъулият билан тайёргарлик кўришганидан далолат берди. Мактаб ўқувчилари томонидан шоирнинг шеърлари ва шоирга атаб ёзилган хотиралар ўқилди. Кечада шеърхонлик, куй-қўшиқ ва рақслар бир-бирига уланиб, кечага ажиб тароват ҳамда файз бағишлади. Кеча сўнггида Севдора Латипова барча иштирокчиларга "Zo'r Тасвир" журнали ва шоирнинг шеърий тўпламларини совға қилди. Мактаб маъмурияти ҳам тадбирда иштирок этган меҳмонларга эсдалик совға-саломларини улашди.