Муножот Йўлчиевага табрик!


     Ўзбекистон халқ артисти - Муножотхон Йўлчиевани таваллуд топган айёми билан табриклаймиз! Муножотхон Йўлчиевага соғлик, узоқ умр ва бахт-саодат тилаймиз. Шашмақом йўналишидаги ва бошқа миллий қўшиқларимиз билан Ўзбекистон санъатини дунёга танитаверсин!

Камоли эҳтиром ила - Muzaffar.uz сайтининг ижодий жамоаси.

     Маълумот учун: Муножот  Абдувалиевна Йўлчиева ўзбек мумтоз мусиқа санъати ривожига ҳамда унинг дунё бўйлаб таралишига беқиёс ҳисса қўшган бетакрор овоз соҳибасидир. Хонанда 1960- йилнинг  26-ноябрида  Андижон вилояти Булоқбоши туманининг Ширмонбулоқ қишлоғида таваллуд топган. Оиласидаги ижодий муҳит болалигиданоқ унинг  қўшиқ куйлашга бўлган қизиқишини орттирди. Аввалига опера хонандалиги йўналишида  таълим ола бошлаган Муножот кейинчалик,  она тупроғимиз муҳитида қадимдан илдиз отган ўзбек миллий, мумтоз қўшиқчилигига ўзгача меҳр қўйди.
       1978 - йилда ўрта мактабни битиргач, ўша йили Тошкент Давлат Консерваторияси Анъанавий мақом ижрочилиги бўлимининг тайёрлов курсига ўқишга қабул қилинди. У ерда устоз созанда ва бастакор Шавкат Мирзаев раҳбарлиги остида таълим ола бошлади. Устоз Шавкат Мирзаев Муножат ўқишга кирган дастлабки  2 йил мобайнида жуда кўп ноёб дурдона асарларни унга куйлаш сирларини ўргатди ҳамда буларнинг аксарияти Ўзтелерадио олтин фондига ёзиб олинди.
       Муножот Йўлчиева 1980 – йил, 9- феврал куни Давлат телевидениедаси томонидан, Алишер Навоийнинг таваллуд айёмига бағишлаб тайёрланган “Назм ва наво” кўрсатувида илк бора чиқиб,  А.Навоийнинг “Ушшоқ”, “Муножот” ашулаларини ижро қилган заҳоти бутун Ўзбекистонда танилди. Шу йилнинг апрел ойида Ўзбекистон Телерадио компанияси қошидаги “Мақом” ансамблига яккахон хонанда сифатида иш фаолиятини бошлади.
       Хонанда шу йилги кириш имтиҳонларини мувафаққиятли топшириб Ўзбекистон Давлат Консерваториясининг 1- босқичига қабул қилинди. 1980 -  йилдан таълим олиш билан биргаликда Муножот Йўлчиеванинг ўз профессионал ижодий концерт фаолияти ҳам бошланди. Хонанда 1985 - йилда Консерваторияни имтиёзли тамомлади.
Хонанда ўзининг ижодий фаолияти ва ўзбек мумтоз мусиқасига қўшган ҳиссаси учун 1991- йилда “Ўзбекистонда хизмат кўрсатган артист”, 1994 - йилда “Ўзбекистон халқ артисти” унвонига, 1998 йилда эса “Эл юрт ҳурмати” орденига сазовор бўлди.
       Хонанда 1995, 1997, 1999-йилларда бир қанча Халқаро танловларда мувафаққиятли иштирок этди. Шунингдек, 1997- йилда Самарқандда бўлиб ўтган “Шарқ тароналари” халқаро мусиқа фестивалида биринчи совринли ўрин соҳибасига айланди.
       2000 – 2004 йилларда ЮНЕСCОнинг “Инсониятнинг моддий ва номоддий меросини сақлаш ва эълон қилиш” ҳайъати аъзоси сифатида фаолият юритди.
       2000 - йилларда эса хонанда ўз хизматлари учун “Офарин” мукофоти (2001), “Фидокорона хизматлари учун” ордени (2004), “ ВВС Word Music Awards ” мукофотининг Осиё минтақаси номзоди (2004), 2006 - йилда Ўзбекистон Давлат Консерваторияси фахрий профессори унвонларига сазовор бўлди.
       Муножот Йўлчиева ижросидаги ашулалар 1981-йилда Тошкент граммпластинкасида тасмага туширилган. Шунингдек, 1995 - йил Франция, 1997 - йил Германияда хонанданинг аудио альбомлари чиқарилган.
       Хонанда ўз ижодий фаолияти давомида ғарб ва шарқнинг - Германия, Австрия, Франция, Бельгия , Голландия, Италия, Испания, Швецария, Норвегия, Швеция, Финландия, Англия, АҚШ, Япония, Жанубий Корея, Хитой, Ҳиндистон, Покистон, Бразилия, Марокаш, Украина, Россия, Иордания, Тунис каби бир қанча давлатларда ўзбек халқининг миллий мероси бўлган Шашмақом ва халқ йўлидаги ашулалари билан яккахон концерт дастурларида ва нуфузли фестивалларда чиқишлар қилиб келмоқда.
       Муножот Йўлчиева 1982 – йилдан то шу кунга қадар Муҳиддин Қори-Ёқубов номидаги Академик ва халқ бадиий жамоалар дирекциясида яккахон хонанда сифатида фаолият юритиб келмоқда. Муножот Йўлчиева кўп йиллардан бери маҳоратли созанда, бастакор Шавкат Мирзаев раҳбарлигидаги созандалар  ансамбли билан ҳамкорликда  ижодий фаолият олиб бормоқда.