БИЗ КИММИЗ?


Қўчқор НОРҚОБИЛ

БИЗ КИММИЗ?

Қайдлар

***
     Агар одамзот ўзини фақатгина ҳайвондан ҳимоя қилишни ўйлаб, хавотирга тушганда эди, бунчалик даҳшатли қуролларини яратмасди.
     Уйингни ё оилангни айиқ ёки бўридан қўриқлаш учун танк, замбарак, атом бомбасининг кераги йўқ-ку!?
 Биз киммиз?!

***
     Отилган ҳар бир ўқ ердан ташқарига чиқиб кетмайди. Отилган ҳар бир ўқ ўлжасига тегмаслиги мумкин, лекин у заминни ярадор қилади --- замин бағрига санчилади. 
Одамзот яраланган замин устида яшаяпти. Ярадор заминнинг бардоши тугаб бораётганини сезмаяпти. Унинг сабр-тоқати, чидами чилпарчин бўлган лаҳзада эса, инсоният ўз хатосини англаб улгуришга ҳам фурсат тополмай қолади --- ҳаммаси ониятда юз беради.
     Хўш, биз киммиз?!

***
     Ўқувчи асримиз ҳақида бор йўғи бир жумлагина иншо ёзди:
     "XXI аср - одамзотнинг бир қўлида гул, бир қўлида қурол..."
     Иншо танловда ғолиб бўлди. Уни баҳолаган муаллим жумла тагига шундай изоҳ ёзди: "Катта бир асар ўқидим..."
     Мени эса ўй босмоқда. Нега шундай?! Биз киммиз?!

***
     Одамиёт уруш қилади, бир-бирини қиради, ер устида ер талашади, ер усти унга торлик қилади. Ер усти инсонга торайган сайин ер ости кенгайиб бораверади.
     Биз шуни тушунмаяпмиз.
     Биз киммиз?!

***
     Фаришта заминга тикилиб турибди; Ерда уруш. 
     Фаришта қайғуга чўмди: "Булар Ердан ҳам қувилса, қаерга сиғишаркан?"
     Бу саволнинг жавоби борми?
     Биз киммиз?!

                       11.10.2022 йил.










Гость, изоҳ қолдирасизми?
Имя:*
E-Mail:


Маълумот