Янги йил табриги


 

АССАЛОМ, ЯНГИ ЙИЛ!


Ҳар куни бир ширин ниятлар ижобати сари илгарилаяпмиз.
Орзуманд дилларни завқларга қораяпмиз.
Сир эмас, юртимизда эндиликда ҳар бир хонадонда деярли икки-учтадан енгил машина бор. Аёллар ҳам боғча, мактаблар сари фарзандларини элтишиб, рулни тутишган, чарчоқни унутишган.
Айрим ҳонадон аъзолари хайдовчилик орқали оила тебратяпти, - десам муболаға бўлмайди. Давлат корхоналарида ишлашса-да, йўл-йўлакай йўловчи олиб, беминнат хизмати сабаб, топган пулига “қора қозони”ни қайнатяпти, ҳарна-да!.. Аммо ўша «ҳарна»нинг улушини олишни “расм” қилган «окахон»ларни шахсан президентимиз томонидан танқид қилиниши беҳад қувонтирди “киракаш”ларни!..

***
Гарчанд нафақада бўлсам-да, ижодкор сифатида ҳамон юрт раҳбарининг ташаббуси сабаб, самолёту учар поездларда вилоятма вилоят кезиб юрибман. Эл орасига кириб борган адабиёт, маданият, санъат аҳли эса ҳам маънан, ҳам моддий тақдирланяпти.Масалан, Зомин семинари сабаб юзлаб ижодкорларга қимматбаҳо планшету, аёллар байрамида эса палон пулли ноутбукнинг олти юздан ошиқ аёлларга совға қилиниши, куни кеча эса ўша таниш «Наврўз» кошонасида яна қуюқ дастурхон солиниб, ижод аҳлининг кўнглини хушлаб, совғалар улашилиши...
Бу эътибор, эътирофлардан бошимиз кўкка етди!

***
Бир ҳамкасбим бир пайтлар «ижодкорнинг кўнглини оғритиб аламзада қилиш ёмон. Бу ёмонлик асарларига «юқиб», кўпларни заҳарлайди» деганди.
Ижодкорнинг кўнгли нозик, бағри кенг.
Оёғи ерда туриб, нигоҳи дунёни кузатади.
Сўз нишаби қаёққа оғаётганини англаб, талашиб-тортишади гоҳи!..
Меҳмон бўлиб ўтирган ҳамкасбларимга қарайман. Аксариятининг ёнида турмуш ўртоғи ҳам бор. Турли нашрларда қайси лавозимда ишласа-да, ёшидан қатъий назар, бари камтар, меҳнаткаш, бола кўнгил...
Кўнгил одамлари эса шу лаҳза, айни чоғда бино ёнидаги Ёзувчилар боғида саф тортган раҳматли қадрдонларининг мангуликка муҳрланган хайкал - қиёфасини ўйлабми ёки бу иззатлардан тўлқинланибми, кўтаринки кайфиятда. Эхтимол кечагина ёнимизда бўлган Эркин Воҳидовнинг шеърларини куйлаётган Шерали Жўраевнинг қўшиқларидандир бу?...

Анъанага айланиб қолган тадбирлардан бири - Алишер Навоий кутубхонасида таниқли санъаткор, сахнамиз фариштаси Рихси Иброҳимованинг таваллуд куни нишонланди. Унинг хамкасби Эркин Комилов мен шу даргоҳда ишлаётганимдан бери 44 нафар машҳур юлдузларимиз билан видолашдик, деганди ҳомуш.Бир - биримизни асрайлик!
Эркин аканинг сўзларини эсларканман, ҳеч қайси мамлакатда эр-хотин ижодкорларга хайкал қўйилмаган экан-ов, дейман ўзимча. Бизнинг Ҳамид Олимжон-Зулфия, Саид Аҳмад-Саида Зуннунова, Ойбек-Зарифахонимларга хайкал қўйилди, ижодкор меҳнатига, иқтидори, имкониятларига баҳо берилди. Буларнинг бари муҳтарам президентимиз Шавкат Миромонович Мирзиёевнинг ташаббуслари ва таклифлари билан бўлмоқда. Ҳатто янги йил байрамида халқимиз беш кунга, мустақиллик куни ва нўврўзда ҳам беш кун,хайит кунлари эса уч кунга дам олишини ҳам белгилаб бердилар.
Янги йил янги асарлар, янги қаҳрамонлар, янги зафарлар йили бўлади, худо ҳоҳласа.


Ассалом янги йил, янги режалар,
Янги ўй - орзули кундуз, кечалар!
Янгилик яратган қўллар, бор бўлинг,
Яхшилик чорлаган йўллар, бор бўлинг!
Бор бўлинг дўстларим, қаро кўзларим,
Сиз билан дил обод, ёруғ юзларим.
Қалбларни қамраган сеҳрлар ошсин,
Қайғуни ҳайдаган меҳрлар ошсин.
Ассалом янги йил, янги кашфиёт,
Мўл бўлсин сенда ризқ, рўзимиз зиёд.
Ошиқлар орзуси ушалсин, дўстлар,
Вафодан поёндоз тўшалсин, дўстлар.
Умида умидин ёққан чироқ бўл,
Шодликка йўлдош бўл, ғамдан йироқ бўл.
Ассалом Янги йил, янги режалар,.
Янги ўй-орзули кундуз, кечалар!..

 

Умида Абдуазимова, Ўзбекистонда хизмат кўрсатган маданият ҳодими.