Шаҳнозабонунинг эфирда "учмаган" "Турналар"и...


Шаҳнозабонунинг эфирда "учмаган” "Турналар”и...

     2016 йил 14 март тонгидаги машъум хабар кўплаб шоу бизнес вакиллари ва оддий мухлисларни ларзага солди.
      Иқтидорли хонанда Шаҳнозабону вафот этди... 
     Кимдир бунга ишонди, кимдир эса йўқ. Ишонасизми, телефоним тинимсиз жиринглаб, ҳамма турли сайтларда қўйилган хонанданинг фотоси ва машъум ҳабар ҳақида сўрарди. "Телеграмм” ва "Ватсаап”да тинимсиз хабарлар келди. Буларнинг орасида шоу олами вакиллари, актёр ва актрисалар, хаттоки,  оддий мухлислар ҳам бор эди.
     Шу йилнинг январь ойи охирларида хонанда билан суҳбатлашиш ниятида боғланган эдим. У билан интервью қилишимизни кўплаб мухлислари сўраётганини айтганимда роса қувонган эди. 
- Вой, ростданми? Мени сўрашяптими? Соғинишиптими? Аммо ҳозир  мухлисларим учун арзирли бирорта янгилигим йўқ.        Яқин кунларда операция қилдиришим керак, шундан сўнг кетма-кет қўшиқларим билан тингловчиларни хурсанд қилишни бошлаб юбораман. Соғлиғимда муаммо бор шекилли. Шифокорлар билан маслаҳатлашиб, Қозоғистонда операция қилдириб келишни режалаштиряпман.
- Тинчликми? Қандай муаммо?!
- Модда алмашинуви туфайли семириб кетяпман (кулади). Соғлиғимга эътибор бермасам, чиройли қадди-қомат билан мухлисларга кўринмасам бўлмайди. Ҳозир бу ҳақида ёзиб юрманг. Операциядан кейин, икки ёки учта қўшиғимга клип суратга оламан, ана ўшанда янги ашулаларим билан чиқсам арзийди. Ҳозир газетхонлар "Айтар янгилиги йўқ экану интервью беришига нима бор?!”- дейишмасин. 
- Янги қўшиқлар тайёрлабсиз-ку? Қандай мавзуларда эди?
- Аслида роса кўп. Масалан, "Қизалоғим” қўшиғимнинг давомини яратиб, уни "Болажоним” деб номладим. Бу ўғил болалар учун куйланса бўладиган вариант. Бундан ташқари "Ошиқлар”, "Борингга шукур”, "Қизим”, "Турналар”, "Онажон”, "Ё раб”, "Биламан” ва "Юлдузимга” номли қўшиқларим бор...
- Эҳҳ-ее, барига битта альбом тўлади-ку...
- Ҳа, энди санъаткор тинч ўтирмайди, касал бўлсам ҳам ишладим. Орадаги танаффусдан сўнг мухлисларга, арзирли ишимни кўрсатишни истадим. "Турналар” кайфият берувчи тарона. Унга клип олишни истаяпман. "Онажон” ҳали чала, қайта бойитиб куйласам, у ҳам яхши қўшиқ бўлади. 
     Шундан сўнг хонанда "телеграмм”имга ҳамма номи саналган қўшиқларини юборди. Тинглаб кўрдим. Мазмунли ва кишини ўйга толдирувчи тароналар. Қўшиқларини тинглагач, унга "Турналар” ва "Борингга шукур” манзур бўлганини айтсам, қувонганидан "Раҳмат, худо хоҳласа тингловчиларга ҳам ёқади. Клип олишни бошлашим билан чақираман”, деди. Аммо...
     Аммо клип суратга олиндими-йўқми, билолмадим. 14 март кунги машъум хабардан сўнг дарров қўнғироқ қилдим. Гўшакни қизи Умида кўтарди...
- Ассалому алайкум, ака узр, онам энди йўқлар. Эшитган гапингиз рост, онамни бериб қўйдик...(йиғлади). Бугун асрга жаноза ўқилади, — деди. 
     Шу гапдан кейин тилимга фақат "Жойи жаннатда бўлсин, яхши инсон эди-я!” дейиш келди холос. 
     Шаҳнозабону санъатга шиддат билан кириб келди. 2000 йилларда илк қўшиғи билан ҳаммани ром эта олди. "Истиқлол” санъат саройида, "Тошкент Давлат цирки”да яккахон концертларини ҳам тақдим этишга улгурди. "Қизғонаман”, "Қизалоғим” қўшиқларини ҳамон ўз тингловчиси. У телеэкран орқали кўплаб кўрсатувларда "қўли ширин бека” эканини ҳам исботлаган эди. Эсимда кўпгина қўшниларимиз, айниқса келинлар унинг таом ва пишириқлар пишириш тўғрисидаги кўрсатувини кутишарди, унда пиширилган таомларни муҳокама қилиб, ўзлари ҳам тайёрлаб кўришганини айтишарди. 
     Шаҳнозабонунинг кўплаб қўшиқлари, хаттоки эфирга берилмаганлари ҳам мухлислар ва яқинлари учун хотира ҳамда мерос бўлиб қолишига ишонамиз. 
     Оғир жудолик сабаб, унинг оила аъзоларига ва яқинларига таҳририятимиз ҳамда муштарийлар номидан чуқур таъзия билдирамиз. 
     Шаҳнозабону сўнгги йўлга кузатилди. Унга сўнгги гапимиз: охиратингиз обод бўлсин! Жойингиз жаннатда бўлсин!

Ёдгорбек ЮКСАЛ тайёрлади.