СЕНИ ЯХШИ КЎРАМАН


СЕНИ ЯХШИ КЎРАМАН
Дўстим, сен билан қанча
Замонларки, жўраман.
Тургин дунё тургунча,
Сени яхши кўраман!
Йўлингни топгин, болам,
Дуо қилиб тураман.
Сеники борлиқ олам,
Сени яхши кўраман.
Улғай, соҳиб замон бўл;
Фахрланиб юраман.
Қайда бўлсанг омон бўл,
Сени яхши кўраман.
Шогирдим, юрагингда
Олам-олам орзу бор.
Мунаввар тилагингда
Устоз меҳри -- ёғду бор.
Осмонни олар бўлсанг,
Елкам тутиб тураман.
Ортингда тоғман, билсанг,
Сени яхши кўраман.
Бу дунёда топганим
Ўзинг ахир, севгилим.
Болга менгзаб тотганим
Сўзинг ахир, севгилим.
Бир яхшига бир ёмон,
Ҳали-ҳануз ғўраман.
Асло қилмагин гумон
Сени яхши кўраман!
О, одамлар, сиз борсиз,
Ёлғизмасман сира мен.
Сиз ағёрсиз, сиз ёрсиз,
Сизни яхши кўраман!
Севишимни айтмасдан
Айтинг, қандай ўламан?
Тирик экан то бу тан
Сизни яхши кўраман!
Амир Худойберди