Боласиз аёлнинг фарёдлари


Умр тикан тўла йўлга айланур,
Ёмғирлар лаҳзада дўлга айланур,
Гулханлар гуриллаб, кулга айланур,
Боласиз аёлнинг фарёдларидан.

Тунлар бошин олиб кетмоқ ҳоҳласа,
Тонглар қаро кийиб отмоқ ҳоҳласа,
Бешикка армонлар ётмоқ ҳоҳласа,
Боласиз аёлнинг фарёдларидан.

Бардошлар сочини ёйиб тўлғонар,
Сабрларнинг қўли қонга булғанар,
Қуёш йиғлаб ботиб, йиғлаб уйғонар,
Боласиз аёлнинг фарёдларидан!

Кўнглини оларга имкон топилмас,
Бош олиб кетарга осмон топилмас,
Бунданда аччиқроқ армон топилмас,
Боласиз аёлнинг фарёдларидан!

Бўш қолган беланчак узилмоқ истар,
Бахт қурган кошона бузилмоқ истар,
Ҳар куни бир қабр қазилмоқ истар.
Боласиз аёлнинг фарёдларидан!

 

Малика Салимова