Ажнабийга ёр бўлма, синглим!


Палагингни тоза тут, элим,
Сиртлон шерга қўшилмагандек,
Сенга қатъий бир сўзни дедим,
Ажнабийга ёр бўлма, синглим!

Бари одам, бари бир лойдан,
Куёв топма Дубайлик бойдан,
Бахт излама бегона жойдан,
Ажнабийга ёр бўлма синглим,

Темурийлар авлодидан сен,
Ўзбекларнинг ўз юрти ҳам кенг,
Тола сочинг минг тиллога тенг,
Ажнабийга ёр бўлма синглим,

Боланг кимга ўхшайди, ўйла,
Қайси тилда сўзлайди, ўйла,
Ўз миллатинг бўзлайди, ўйла,
Ажнабийга ёр бўлма синглим,

Онанг тўйда чиқолмас тўрга,
Отанг юзин қаратма ерга,
Ўзбегимга тегсанг тег эрга!
Ажнабийга ёр бўлма синглим.

Кейин аттанг бўлмас сенга кор,
Юртни қўмсаб жон чекса озор,
Сендан битта илтимосим бор,
Ажнабийга ёр бўлма синглим!

Ўзга юртнинг шохи бўлгунча,
Ўз юртингни гадоси бўлгин!
Ўзбек бўлиб ўла - ўлгунча,
Ўлсанг, она Ватанда ўлгин!

 

Малика Салимова