ШИРИН СЎЗ — ЯРИМ ДАВО


 

 

ШИРИН СЎЗ — ЯРИМ ДАВО

 

     Республикамизда шундай шифохоналар, тажрибали, ширинсухан шифокорлар ва ҳамширалар борки уларнинг фидойиликларини таърифлашга сўз тополмай қоламан.

     Яқинда 2-сонли Республика клиник шифохонасининг асаб касалликлари бўлимида ётиб даволандим. Мени шу шифохонанинг бош шифокори Мирносир Мирюнусов очиқ чеҳра билан кутиб олди. Шикоятларимни эшитгач, дарҳол асаб касалликлари бўлими мудири тажрибали шифокор Алижон Одиловни чақиртирди. А.Одилов мени палатага ётқизиб, шикоятларим асосида дарҳол муолажани бошлади. Катта ҳамшира меҳрибон  ва ғамхўр Дилфуза Мусаматова ўзининг ширинсўзлари билан кўнглимни кўтарди. Синчков ва фидойи бўлган хўжалик бекаси Дилором Ғуломова менга зарур бўлган чойшаб ва сочиқлар билан таъминлади. Маҳоратли ўз касбининг усталари Наргиза Мусаева, Нигора Шораҳимова, Нилуфар Ихлосова, Зулайхо Абдуназарова, Мадина Хўжамбердиева ва Фарангиз Мардонова каби ҳамширалар кечаю кундуз беморлар атрофида парвона. Тозалик посбонлари Саодат Ахмонова, Гулшод Пирматова, Соҳиба Турғунбоева ва Дилафрўз Тошпўлатовалар эса бўлимни тоза-озода тутишга шайдирлар. Озотерапия ҳамшираси Ўғилой Раҳимбоева беморларга укол қилиш бўйича чемпион десам муболаға бўлмайди. Клиникада томирга укол қилишдек ишни у биринчилардан бўлиб, қойилмақом қилиб бажаради. Ҳамшира Азиза Турсунхўжаеванинг соғломлаштириш машқлари беморларни тетиклаштиради, ҳаётга тийракроқ қарашга чорлайди. Силаб даволовчи яъни массажчи Гўзал Шорасулованинг қўллари теккан беморлар дарҳол оёққа туришади. Парафин билан даволовчи Дилноза ва Дилфузалар ҳам беморларга сидқидилдан хизмат кўрсатишади.

     Клиникада тиббий маданиятни ошириш борасида ҳам талайгина ишлар қилиниб борилмоқда. Ҳар ҳафтада шифокорлар турли мавзуларда қизиқарли маърузалар қилишиб, беморларнинг саволларига батафсил жавоб беришмоқда. Мен ётган вақтимда ҳам “Тўғри овқатланиш” ва “Қандли диабет” ҳақидаги маърузаларни тингладик. Ўзимиз қизиқтирган саволларга шифокорлардан жавоб олдик. Энг муҳими билмаганларимизни билдик.

     Ҳамширанинг нигоҳи ўткир бўлмоғи лозим. Ана шундай ўткир нигоҳли, тажрибали, синчков ва маҳоратли ҳамширалар 2-сонли Республика клиник шифохонасида жамулжам бўлишган десам муболаға қилмайман. Аслида ширин сўз ҳам — ярим даво дейишади. Шифокорлар ва ҳамшираларнинг ширин сўзлари туфайли тезда оёққа турганимдан хурсандман.

     Ҳар бир бемор учун қайғурувчи, унинг дардини ҳис этувчи мана шундай шифокорлар, ҳамширалар кўпайсин! Мен уларга таъзим қиламан!

 

Хонбиби ҲИММАТ қизи, журналист