Dardkash qalbni izlaydi
O‘zbekiston xalq shoiri - Halima Xudoyberdiyevaning 1968 yilda chop etilgan «ILK MUHABBAT» nomli she’riy to‘plamidan. "Dardkash qalbni izlaydi".
Muzaffar Muhammadnazar ijrosida.
O‘ylamangki, uning qalbi yo‘q —
Ko‘pni sevar, ko‘pni ko‘zlaydi.
Hamma bilan bo‘lsa ham do‘st, sho‘x —
U bir dardkash qalbni izlaydi.
Hayot takror uchrashtirarkan,
Kimni «sen»lab, kimni «siz»laydi.
Yo‘q, ularga bermaydi u tan —
U bir dardkash qalbni izlaydi.
Dersiz «oshiq»lari emas kam,
U, qanchasi unga so‘zlaydi».
Dil rozlarin tinglab turib ham —
U bir dardkash qalbni izlaydi.
Yoki demang «qish sovug‘iday, —
Unga yaqin yurgan muzlaydi».
O‘zgalarga harorat bermay —
U bir dardkash qalbni izlaydi.
Demang, ma’yus tortib qolgan dam —
«Unutgan oshig‘in eslaydi».
Ishonchini hamon qilmay kam,
U bir dardkash qalbni izlaydi.
1967 yil 8 iyun