Олов қаъридаги аёл


Жавоб берасанми саволларимга,
Жизғанак танангдан чиқарми бир сас?
Ўзинга ўт қўйиб, нима наф топдинг,
Дўзах оловларин қилдингми ҳавас?

Кимнинг битта туки қилт этди,
Ё, Раб,
Кимнинг зарра бўлса ачиди жони?!
Олмаган эдингми Худодан сўраб,
Синовга берилган яшаш имконин!

Нимани исботлаш мумкин,
Ўт қўйиб,
Қайси дард кулларин кўкка совурдинг.
Нега кўзларингни ёғини доғлаб,
Муштдек юрагингни унда қовурдинг!

Хўш,
Нима ўзгарди сен ёнган билан,
Қайси қарорларга басдир бу қарор?
Минг бора ўлганинг кимга зиёну,
Минг бора ёнсанг ҳам бундан не наф бор.

Кетса жонинг кетди,
Тугаса - умринг,
Ҳолинга ким йиғлар, кимлардир кулар.
Эҳ нодон, ўз-ўзин ўлдирганларга,
Ҳатто жаноза ҳам ўқимайдилар!

Куйдингу, айт нени қила олдинг ҳал,
Ёндингу, азобдан азобга ўтдинг,
Ҳали келмасидан қошинга ажал,
Сен ўзинг ажални ахтариб кетдинг!

Малика Салимова.