ЁШ КЕЛИН-КУЁВ СУҲБАТИДАН


Бобур БОБОМУРОД

ЁШ КЕЛИН-КУЁВ СУҲБАТИДАН 
(ҳазил) 

Келинчак соч учин бармоққа ўрар, 
Ёридан нозланиб, оҳиста сўрар: 
- Севасизми мени, жону жаҳоним?
Ёри дер: "Севаман, албатта, жоним". 

Шодланиб, истакка этади жазм:
- Мен учун чекишни ташланг, азизим...
- Ташлайман майлига, хурсанд бўлсанг, бас,
Ҳеч бир одат сендан афзалроқ эмас... 

Янада қувониб этади давом:
- Наҳот ичишни ҳам ташлайсиз тамом?!
- Ҳа, тарк этгум ушбу ёмон қилиқни,
Тутган каби бўлдинг тилло балиқни. 

- Сўрасам, олмасин малол дилингиз,
Берасизми менга топган пулингиз?
- Топганим сеники, олавер барин,
Сендан ортиқ кўрмам бу дунё зарин. 

- Мунча ҳам яхшисиз, сахий нақадар,
Жон ҳам берасизми сўрасам агар?!
- Жонимни ол, менда тўхтасин юрак,
Ахир, бундай ҳаёт кимга ҳам керак?!. 
 
2021.1.7. 23:40.