Руҳим дарчалари


Хосият РУСТАМОВА

***

Тасодифан келди ва кетди шамол...
Деразам хўрсинди, оғир олди тин.
Кўчада айланиб юриб бемалол -
Юрагимни этди остин ва устун.


Қайси кўчаларга бошлаб кетди у, 
Менинг ҳаётимни чиқариб издан.
Тумандай тарқалди мендаги қўрқув-
Кечаги кунимдан қолмади из ҳам.


Қандай севган эдим сени ўша кун,
Йўлларда дарахтлар, кўкда ой гувоҳ!
Шуълалар одимлаб кетганди узун -
Ерлар кетган эди мендан чуқурроқ....


Хаёлим паришон, жоним титроқда...
Руҳим дарчалари очилганди кенг.
Мендан анча баланд, юқорироқда-
Яхшиям бор эдинг, бор эдинг, Сен...Сен...

 

* * *

Ўрганиб кетганман.
Бу ҳолат таниш –
Фақат етмай қолар баъзан тоқатим.
О, нима қиларди бўлмаса шу иш,
Икки соат олдин пишган овқатим?


Шамоллар кўчамдан югуриб ўтди,
Ҳовлига қаради менга ачиниб.
Азизим, умримнинг ярмидан кўпи
Сенинг йўлларингга кетди сочилиб.


Сен яна кечикдинг.
Биламан, иш кўп,
Кўзимдан ўтасан ҳорғин ҳолингда.
– Кутяпман, бошимда юлдузлар тўп-тўп,
Ойни орқалаган осмон ёнимда.

 

* * *

Тирикманми ўзи?
Борманми ё йўқ?
Ўзимни суяшга етишмас ҳолим.
Ёнар вужудимда бошдан оёқ ўт,
Қаерга қочишни билмайди жоним.


Қайгадир йўқолган кўксимдаги тафт –
Нимаки иш бўлса – қўл силкир қўлим.
Кўзимда гўёки осмон ҳам бир кафт,
Замин ҳам кўринар бир сиқим бўлиб.

* * *

Чироқлар гоҳ ёниб, гоҳ ўчиб чиқди,
Бедор тун тўлғонди.
Шамолда хатар.
Юлдузлар бир ухлаб, бир чўчиб чиқди,
Қўрқувдан югуриб чиқди дарахтлар.
Тонггача тинмасдан тарақлади том,
Чинқирди қайдадир қузғуну жинлар.
Ниҳоллар ҳушидан кетди батамом –
Жонидан умидин узди узумлар.
Йўллар кўлмакларда йиқилди тойиб,
Ёмғирда шалаббо бўлди чироқлар.
Далли-девонадай сочини ёйиб –
Куз каби кўрсатди ўзини боғлар.
Кўзларга келмади адашган уйқу,
Дераза чарсиллар, дарвоза ихрар.
Тутиб кетмасин деб дунёни қўрқув,
Дардини ичига ютди балиқлар.

 

***

 

Бир кун ишқ йўлида Мажнун бўлар тол,
Ҳайқирар юраги тўкилиб, тўлиб.
Уни йиқитолмас ҳеч қандай шамол,
Осмонда яшар у хаёлга чўмиб.


На ариқ, на кўприк уролар йўлдан,
Бежавоб қолдирар саволларини.
Билмас у. Оққушлар ўғирлаб қўйган –
Лайли дарахтларнинг хаёлларини.










Гость, изоҳ қолдирасизми?
Имя:*
E-Mail:


Изоҳлар
Феруза Абдуллаевага табрик
Инсонни безаги унинг маьнавий қиефаси деб биламан, чунки у еки бу инсон қанчалик бой- бадавлат бўлмасин, гар унда қалб бўлмаса, мехр бўлмаса, идрок
Қалпоқ - Ўғри
Ассалому алайкум. Мен "Youtube" каналидан Қалпоқ хажвий кўрсатувини мунтазам кўриб бораман. Ўз юртимизда бачкана бўлмаган, менталитетимизга тўғри
Муслимбек Йўлдошев - "Эслаб, эслаб" кўрсатувида
Мени унча яхши билмайдиган бошловчилар билан жуда кўп кўрсатув ва эшиттиришларда эфирга чиққанман. Аммо Фарҳод Абдуллаев билан биз институт
Фахриддин Шамсиматовга табрик!
Фахриддин Шамсематов ни жуда хурмат қиламан. Унинг "Сардор-2", "Остона", "Ёзсиз йил", "Кўринмаслар", "Ҳақиқий эркаклар ови", "Окахон" каби кўплаб
Ўктам Усмонов таваллуд топган кун
Бу ерда хам телевидение қудратини тан олиб ўтмасак бўлмайди. Бошқа асарлари каби “Гирдоб” романларини ҳам кўпчилик билмай қолмши мумкин эди. Сеҳргар
Маълумот