Она... Онажонима...


 

Она...
Онажонима...
Бору-йўқлигингиз сезилмайди-я,
Ҳамма ўз қадрини билиб юрибди,
Сизнинг кўнглингиз ҳеч бузилмайди-я.
Онама!

Сиз ҳам ўзингизни ўйланг оооозгина,
Қўлингизни беринг, кўзимга босай,
Лабларимга босай, юзимга босай,
Сиз ҳам она бўлиб лоақал бир бор,
Ношуд болангиздан қилмайсиз гина!

Биламан, мен нодон биламан она,
Тунлар юрагингиз оғришлигини.
Соппа-соғ боламни ўйлайман яна,
Пешонасига лаб босиб ҳар куни!
Онамааа, онам!

Ман яхшиман дейсиз, кулиб қўясиз,
Билмасин дейсизми хасталигимни.
Мен ҳам онажоним сизга қўшилиб,
Алдаб юрибман-да ўзим-ўзимни!
Онама!

Юрагим узилар, қувиб хаёлни,
Шаксиз тўлмайдими бир кун паймона!
Хастаман денг, оғрияпман денг,
Мени алдаб қўйманг, жооон она!

Айтинг, болам мени дўхтирга элт денг,
Мен ҳам одамман денг, ҳамма эшитсин.
Сизни ҳолингиздан хабар олмасдан,
Шеър ёзган мана шу қўлларим синсин!
Онама, онам!

Кийим олиб бер денг, рўмол келтир денг,
Ёнимдан силжима кетма, ўлтир денг!
Ахир шунчалар ҳам бўларми одам,
Нега юрагингиз шунчалар ҳам кенг!
Онагинама!!!

Дардингизни олай, дардингиз олай,
Жонимни бера-ю, юринг оғримай.
Бир умр болам деб, борини берган,
Бир кун яшай қолинг энди,йиғламай.

Юрсам давраларда арзанда бўлиб,
Шарафларга тўлиб, шонларга тўлиб,
Ўшал кунларимга етинг онажон,
Кўнглимни тўлдиринг ёнимда бўлиб,
Онама!

Худо, худовандим, қудратинг кўрсат,
Куйда ҳам, дилда ҳам, тилда ҳам нолам
Онамни олмай тур, олмай тур фақат
Ёнимда юрсинлар муштипаргинам!

***

Ухлаб қолсам, уйғотманг она,
Чарчаб кетдим, қаттиқ толиқдим.
Юрак - каптар қамалган хона.
Хаёлимнинг ҳаволари дим.
Тиззангизга бошим ботмасин.
Фақат қўйманг қучоғингиздан.
Айтинг, тонгга, бугун отмасин.
Она, айтинг, илтимос сиздан!

Эртак айтинг, аллалар айтинг,
Бола бўлай яна бир кунга.
Ҳей, боламни уйғотмагин денг,
Шамчироқдан чиққан тутунга!

Толдим она!
Онажон толдим,
Тирикликдан шунча озорми?
Дунё бузуқ тарозуми, ё,
Тарозуси бузуқ бозорми?

Ухлай она,
бошимни силанг,
Қўлингизда сутнинг иси бор.
Юзингизда энг чиройли ранг,
Ва мен учун энг ҳушбўй ифор!

Бунча иссиқ меҳрнинг бағри,
Эрияпди томирларда қон.
Турмуш деган тақдирнинг қаҳри,
Уйғотмасин мени, онажон!
***
Қўлингизга боқса қадрдон дўстлар,
Ҳеч бутун бўлмаса бу каму кўстлар,
Саломин миннатлаб турса нокаслар,
Сиз учун дуода бўлганни асранг!
Онангиз асранглар, отангиз асранг!
Ёлғон дунёдир бу, бевафо дунё,
Гирдобдек домига тортади гўё,
Берган амаллари, мансаби рўё,
Сиз учун дуода бўлганни асранг!
Онангиз асранглар, отангиз асранг!
Вафо ваъда қилган гўзал дилдорлар,
Кун ўтмай ўзгани йўлини пойлар!
Бир кун қолиб кетар қаср, саройлар,
Сиз учун дуода бўлганни асранг!
Онангиз асранглар, отангиз асранг!
Жойнамоз устида бедор ҳар кеча,
Оллоҳдан умрингиз тилар тонггача,
Имкони бўлса гар сўнгги кунгача,
Сиз учун дуода бўлганни асранг!
Онангиз асранглар, отангиз асранг!
Қизингиз қирга-ю, ўғлингиз ўрга,
Ким пойгакка чўкар, кимингиз тўрга,
Азиз бўлмасин-да кирганда гўрга,
Сиз учун дуода бўлганни асранг!
Онангиз асранглар, отангиз асранг!
***
Қанча кунларим бор, саноғин билмам,
Келгандан кетишин тезлар давронлар,
Менку бўлаверай нима бўлсам ҳам,
Онам қарияпди, ёронлар!
Соғ юрган кунидан хаста куни кўп,
Ҳаёт синовлари калтаклади хўп,
Яна қанча кутар уни талатўп,
Онам қарияпди ёронлар!

Ўйлар юрагимни тортар ортига,
Сафарлар қиламан армон юртига,
Дардларин чиқазмай асло сиртига,
Онам қарияпди ёронлар!

Золим вақт кетига боқмас ўгрилиб,
Ҳасратдан бу жоним борар қоврилиб,
Кунлари йилларга беҳуд соврилиб,
Онам қарияпди, ёронлар!

Қарзларим сўнгича узмоқлик маҳол,
Мингтадан биттасин уздим эҳтимол,
Эй Тангрим, ол менинг кунларимдан ол!
Онам қарияпди ёронлар!

Нолимоқ гуноҳдир, гуноҳи кабир,
Ҳар не берганига қилурман сабр,
Фақат соғинмай тур онамни қабр,
Онам қарияпди ёронлар!
***
Эрка эдим эллик ёшимда,
Кимдир бедор ҳаста бошимда,
Тунлар алла айтиб қошимда,
Унда ҳали онам бор эди!

Йўқлагучим кунда бир албат,
Йўқ эди-я мендек бадавлат.
Ҳаммадан ҳам гўзал, ҳушсурат,
Унда ҳали онам бор эди!

Юрар эдим хотиржам, кулиб,
Завққа тўлиб, шодликка тўлиб,
Тиргак бўлиб, суянчиқ бўлиб,
Унда ҳали онам бор эди!

Куйсам адо бўлган бир зумда,
Дардим англаб олган кўзимдан,
Дуоларин йўллаб изимдан,
Унда ҳали онам бор эди!

Ёмонларнинг кўзи тегмасди,
Туҳматлари бошим эгмасди.
Ёв келса ҳам мени енгмасди,
Унда ҳали онам бор эди!

Бир сония ўйлаб ўтирмай,
Жоним учун жон беришга шай,
Мендан ўзга ташвишни билмай,
Унда ҳали онам бор эди!

Мен ўзидан ортмаган нодон,
Ҳар замонда топиб бир имкон,
Қайда энди шундай меҳрибон,
Унда ҳали онам бор эди!

Раҳми бисёр, меҳри беминнат,
Ширин забон, дилбар, ҳушсуҳбат,
Мен билмаган ўта омонат,
Унда ҳали онам бор эди!

Ё етдимми, етмай қадрига,
Тополмадим чора дардига,
Болам дея босган бағрига,
Унда ҳали онам бор эди!

ОНАСИ БОРЛАР! ОНАЛАРНИ АСЛО ЁЛҒИЗЛАТИБ ҚЎЙМАНГ!
 
Деворларни ушлаб юра бошласам,
Гапларим нотўғри қура бошласам,
Каллаи-саҳарлаб тура бошласам,
Менга қовоғингни уйма, жон болам,
Асло ёлғизлатиб қўйма, жон болам!
Чойимга бўктириб есам нонимни,
Хотининг койиса олмай ёнимни,
Қийин қийноқларга қўйиб жонимни,
Менга қовоғингни уйма, жон болам,
Асло ёлғизлатиб қўйма, жон болам!
Бир гапни ўн марта қайтариб айтсам,
Нонга деб кетсаму, нон олмай қайтсам,
Бир кун соғ, ўн беш кун тўшакда ётсам,
Менга қовоғингни уйма, жон болам,
Асло ёлғизлатиб қўйма, жон болам!
Қиммат идишларинг синдириб қўйсам,
Кўрпамни қуёшга илдириб қўйсам,
Устимдан ҳаммани кулдириб қўйсам,
Менга қовоғингни уйма, жон болам,
Асло ёлғизлатиб қўйма, жон болам!
Келмасанг, ўн марта қилсам қўнғироқ,
Қайдасан болам деб хўп қилсам сўроқ,
Билсанг, хавотирдан ўлган яхшироқ,
Менга қовоғингни уйма, жон болам,
Асло ёлғизлатиб қўйма, жон болам!
Меҳмонинг келганда ўтираман жим,
Онанг эканимни билмайди ҳееееч ким,
Хонамга қамасанг, оғрийди қалбим,
Менга қовоғингни уйма, жон болам,
Асло ёлғизлатиб қўйма, жон болам!
Ўксиб йиғлайверсам ҳуда-беҳуда,
Бирор таом қўмсаб қолсам гоҳида,
Тўрдан гўрим яқин бўлган чоғида,
Менга қовоғингни уйма, жон болам,
Асло ёлғизлатиб қўйма, жон болам!

Малика ТАВФИҚ (Салимова) - Ўзбекистон Ёзувчилар уюшмаси аъзоси, шоира ва педагог.










Гость, изоҳ қолдирасизми?
Имя:*
E-Mail:


Маълумот