СУД МАЖЛИСИДА МОБИЛ ВОСИТАЛАРИДАН ФОЙДАЛАНИШ МУМКИНМИ?


СУД МАЖЛИСИДА МОБИЛ ВОСИТАЛАРИ ОРҚАЛИ ИШТИРОК ЭТИШ МУМКИН 
 
   Мамлакатимизда фуқароларнинг ҳуқуқ ва эркинликларини, энг аввало, жиноий тажовузлардан ҳимоя қилишнинг ишончли кафолатларини таъминлашга, шунингдек, уларнинг шаъни ва қадр-қиммати камситилишига, қонуний манфаатлари чекланишига йўл қўймасликка қаратилган кенг кўламли ишлар амалга оширилмоқда.  
   Жумладан, Ўзбекистон Республикаси Президентининг 2020 йил  3 сентябрдаги "Суд ҳокимияти органлари фаолиятини рақамлаштириш чора-тадбирлари тўғрисида”ги Қарори қабул қилинди.
  Ушбу қарорда суд орқали шахсларнинг ҳуқуқларини ривожланган инновацион технологиялардан фойдаланиш орқали амалга ошириш тартиби белгилаб берилди. 
   Ҳозирги ривожланган даврда ҳар бир шахснинг ахборот олиши учун гаджет, ноутбук, уяли телефон аппаратлари катта ўрин эгаллайди. Бунинг сабаби бундай воситалардан фойдаланиш эҳтиёжларни қулай, тез, сифатли ва арзон эканлигидир. Давр талабидан келиб чиқиб, суд органларида ҳам инновацион технологиялардан фойдаланиш тартибини қонуний белгилаш жисмоний ва юридик шахсларнинг бузилган ҳуқуқларини қисқа муддатларда тиклаш, ҳаражатларни тежаш ва имкониятларни кенгайтириш мақсадида қабул қилинган қарорда қуйидагилар белгиланди: 
- фуқаролар ва тадбиркорлик субъектларига кўрсатиладиган интерактив электрон хизматлар турларини кенгайтириш;
- ҳар бир мурожаатни кўриб чиқиш жараёнининг онлайн кузатиб борилишини таъминлаш;
- суд биноларида интерактив хизматлардан эркин фойдаланиш имкониятини яратиш; 
- судларда одил судловни амалга ошириш учун зарур бўлган маълумотларнинг тезкорлик билан олинишини таъминлаш учун вазирликлар, идоралар ва бошқа ташкилотлар билан электрон маълумотлар алмашинувини янада кенгайтириш; 
- махсус ахборот дастурларини жорий этиш орқали судьялар ҳамжамияти органлари фаолиятининг очиқлиги ва шаффофлигини таъминлаш; 
- суд мажлисларида масофадан туриб, жумладан мобил қурилмалар ва электрон ҳамкорликнинг бошқа шакллари орқали иштирок этиш имкониятини кенгайтириш;
- шунингдек иш бўйича тарафлар учун суд қарорларини онлайн тарзда олиш имкониятини яратиш кабилар. 
   Шунингдек, 2021 йил 1 октябрдан бошлаб барча иштирокчиларни суд мажлисларининг вақти ва жойи ҳақида «SMS» хабар орқали бепул асосда хабардор қилиш тартиби жорий қилинади. 
   Бундай технологияларни суд ҳокимияти фаолиятига татбиқ этилиши ҳар бир судья ва суд аппарати ходимининг замон талабларидан келиб чиқиб, ахборот технологиялари воситаларидан етарли даражада фойдаланиш вазифасини юклайди. 
 
Сардорбек АБДУСАТТОРОВ,
Жиноят ишлари бўйича Учқўрғон 
туман судининг раиси            
 
Акмал АБДУСАЛОМОВ,
Жиноят ишлари бўйича Учқўрғон  
туман судининг девонхона мудири
Наманган вилояти.