АЛДОҚЧИ АДВОКАТ


     Чўкаётган одам қандай қилиб бўлмасин сувдан чиқиш учун ҳаттоки хасга ҳам ёпишади, деган гап бор. Жиноят қилиб қўйган ёшларнинг ортидан уни қутқариб қолиш учун ўзини ўтга, чўққа урадиган ота-оналар бисёр. Чунки у жиноятнинг жирканч кўчасига кирган бўлса ҳам фарзандида...
     Севдоранинг ўғлига жиноят иши бўйича эҳтиёт чораси қамоқ қўлланилиб, судланувчи тариқасида ўтаётганди. Онаизор нима қилишини билмай яқинларига, қариндош-уруғларига маслаҳат солди. “Битта ўз ишини зўр биладиган авдокат ёлласанг, ҳаммаси изга тушиб кетади” дейишди улар.
     Шундан сўнг у “Гулрухсор — Адвокат” фирмаси директори Каримахон Абдуносировага мурожаат қилди.
     —“Пул бўлса — чангалда шўрва” дейдилар. Ўлимдан бошқа ҳамма нарсанинг иложиси бор. Мен сизга, албатта ёрдам бераман. Ўғлингиз тез кунда қамоқдан чиқиб кетади. Бунинг учун жиноят иши бўйича зарарни қоплаш лозим. 10.000 долларни туман суди депозит ҳисоб рақамига қўйиш керак. Сиз менга айтилган пулларни олиб келиб берсангиз, ишимиз осонгина ҳал бўлади.
     Севдора ўғлини қамоқдан чиқариб олиш умидида тезда уйига ошиқди. Бу ҳақда турмуш ўртоғини ҳам хабардор қилди. Улар маслаҳатлашиб, қариндош-уруғлардан қарз олишди. Айтилган доллар тўплангач, Севдора дарҳол адвокат Каримахонга қўнғироқ қилди. Улар Ялонғоч мавзесида учрашадиган бўлишди. У ерга Севдора турмуш ўртоғи билан биргаликда борди ва ўз қўллари билан 10.000 долларни адвокат аёлга топширди.
—Тез орада ўғлингиз уйингизда бўлади. Сираям хавотирланманг, — дея улар билан хайрлашиб Каримахон кетди.
Ота-она унинг ортидан худди елкаларидан тоғ ағдарилгандек қараб қолишди. Каримахон қонунни яхши билса-да аммо С.Нурованинг ўғли А.Нуровни ҳуқуқларини судда ҳимоя қилиш мақсадида шартнома тузмади, расмий равишда иштирок ҳам этмади. Фақатгина Севдоранинг мулкини қўлга киритиб, пулларни ўз эҳтиёжларига ишлатиб юборди.
     Суд бўлиб ўтди. А.Нуров қамалиб кетди. Бундан ажабланган Севдора йиғлаганича адвокат аёлга берган пулларни суриштирди. Афсуски бу пуллар суднинг депозит ҳисоб рақамига топширилмаганлигини билиб олди. Азият чеккан онаизор адвокатдан пулларини қайтариб беришни талаб қилди. Аммо Каримахон унинг пулларини қайтармади.
     Ноилож қолган Севдора адвокат аёлнинг устидан ариза билан ҳуқуқни муҳофаза қилувчи органларга мурожаат қилди.
Шундан сўнггина Каримахоннинг пайтавасига қурт тушди. Пулларни қайтариб бермаса оқбати ёмон бўлишлигини билиб, танишларидан қарз кўтариб жабрланувчиларга олган пулларини қайтариб берди.
     Каримахон аввал ҳам жиноятга қўл уриб, тегишли жазосини олганди. Аммо “Менинг нафсим балодур, ёнар ўтга соладур” деганларидек нафс балоси уни яна жиноятнинг кўчасига етаклади.
     Суд Каримахон Абдуносировани Жиноят Кодексининг 168-моддаси 3-қисмининг “а” банди ва 205-моддаси 2-қисмининг “а,в”бандлари билан айбдор деб топди.
     Жиноят Кодексининг 59-моддасининг 8-қисмига кўра жиноят ишлари бўйича Ўртачирчиқ туман судининг 2010 йил 4 июндаги ҳукми билан тайинланган жазони қисман қўшиш йўли билан энг кам ойлик иш ҳақининг 450 баравари, яъни 15.342.000 сўм жарима жазоси ва 2 йил, 6 ой муддатга адвокатлик фаолияти билан шуғулланиш ҳуқуқидан маҳрум этилди.
     Кўр ҳам ҳассасини бир марта йўқотади, дейди доноларимиз. Қонунни яхши била туриб яна жиноятга қўл урган инсонни ким деб аташимиз мумкин, ким?..

Хонбиби ҲИММАТ қизи, журналист