ҚИЗ БОЛАНИНГ ҚЎЛИ ЭГРИ БЎЛСА-Я...


     Қиз бола азалдан нозик хилқат саналиб келинган. У мисли ғунчага қиёсланади. Шаъни эса оппоқ пахта кабидир. Оқ пахтага доғ тушса, қандоқ хунук кўринади-я?! Оила қуриш бўсағасида турган қиз шаънига нисбатан “қўли эгри экан” ёки “у хавфли рецидивист” дейилса-чи? Таъби хира бўлади эшитган кишининг...

     Қолаверса, оила аъзолари ва яқинларининг эса бу исноддан боши хам бўлгани тайин.

     Сирдарё вилояти, Ховос туман суди раиси Б.Мамадаминовнинг маълумот беришича, туманда Ш.Маликова(исм-шарифлари ўзгартирилган) исмли ёш қиз иккинчи маротаба ўғрилик жиноятини содир этганлиги учун судланган. У ўзганинг мол-мулкини яширин тарзда талон-торож қилишга эришган. 

     Иш ҳужжатларига кўра айбланувчи 2019 йил 27 июнь куни соат 20:45 ларда Р.Парпиеванинг уйи ҳовлисига кирган. Ҳеч ким йўқлигидан фойдаланиб, у ҳаммом эшигига илинган калит билан хонадон эшигини очиб кирган. Ичкаридаги шкафда турган уй бекасининг сумкасидаги бир дона кумуш ва уч дона тилла узукларни ўғрилаб, воқеа жойидан яширинган.

     Суд, дастлабки тергов жараёнида 70.000 сўмлик кумуш узуги Р.Парпиевага қайтарилганлиги, қолган уч дона тилла узукларнинг пуллари айбланувчининг яқин қариндошлари томонидан жабрланувчига тўланганлигини инобатга олди.

     ЖПКнинг 454, 455, 457, 463, 465-468, 471-473-моддаларига амал қилиниб, айбланувчи Ш.Маликова ЖКнинг 169-моддаси 3-қисми “а” бандида назарда тутилган жиноятни содир этганликда айбдор деб топилди.

     Содир этган ўғрилиги учун у (ЖКнинг 57-моддаси қўлланиб, сутканинг соат 21:00 дан 06:00 гача яшаш жойидан чиқиши чекланган ҳолда)  икки йил-у,олти ой муддатга озодликдан маҳрум этилди.

  

Моҳичеҳра Эшмирзаева