1-Апрель ҳангомалари - Анвар Намозов


ЕВРОРЕМОНТ УЙ СОТИЛАДИ!

 

Ҳамма билан ҳазиллашиб юрадиган бир қўшнимизни бопламоқчи бўлдик. 31 март куни чиройли матн ёздим:
«КВАРТИРА СОТИЛАДИ! СРОЧНО!!!
1-қаватдаги 1 хонали уй сотилади! Зудликда! Евроремонт! Жуда арзон! 7.000 доллар! Нархини келишиш ҳам мумкин...»
Матнга «квартира сотадиган» қўшнимизнинг уй ва қўл телефони рақамларини илова қилдим.
Шундан сўнг принтердан қоғозда чиқартириб олиб, қирқиб-кесиб, 30 тача тайёрладим.
Кечки соат 12 ларга яқин уч нафар қўшни ҳиринглаб кулганча «операция»ни бошладик. Кўчадаги дарахт борми, симёғоч, эшик, дўконми, ҳамма жойга эълон матни ёзилган қоғозларни елимлаб чиқдик...
Эртаси куни роса қўнғироқ қилишибди-да ўзиям!
«Ким айтди? Нега сотарканман? Бу гап қаердан чиқди?» деб хуноби чиқибди қўшнимизнинг. Уй телефони гўшагини қўймай туриб, соткаси жиринглармиш! «Барака токур, сотмайман уйимни! Қайси аҳмоқ бунча арзон нархда сотади?» дермиш! Яна жингир-жингир! «Илтимос, ока, менга сотинг, пул нақд, ҳозир олиб бораман», дейишармиш! Баъзилар эса: «Озгина арзон қилмайсизми?» дермиш .
Эр-хотиннинг бўғзига келибди! Қўнғироқларга жавоб бермай қўйишибди! Кўчадаги эълон матнларини йиртиб олишибди! Барибир қўнғироқ устига қўнғироқ!..
Қўшним биз ҳазиллашганимизни барибир билди! Анча вақтгача тумтайиб юрди.